ចាប់ពីថ្ងៃទី ១១ ខែវិច្ឆិកា ខេត្ត Punjab របស់ប៉ាគីស្ថានបានហាមឃាត់សកម្មភាពក្រៅផ្ទះភាគច្រើន ហើយបានបញ្ជាឱ្យហាង ផ្សារ និងមជ្ឈមណ្ឌលលក់ទំនិញនៅតំបន់មួយចំនួនបិទមុនកាលកំណត់។

នេះគឺជាវិធានការចុងក្រោយបំផុតដើម្បីកំណត់ហានិភ័យនៃជំងឺសម្រាប់មនុស្ស នៅពេលដែលកម្រិតនៃការបំពុលបរិយាកាសនៅក្នុងមូលដ្ឋាននេះនៅតែស្ថិតក្នុងកម្រិតខ្ពស់នៅឡើយ។
ជាពិសេសខេត្ត Punjab បានបិទកន្លែងអប់រំ និងទីសាធារណៈរហូតដល់ថ្ងៃទី ១៧ ខែវិច្ឆិកា។ ព្រឹត្តិការណ៍កីឡាក្រៅផ្ទះ ការតាំងពិព័រណ៍ និងពិធីបុណ្យនានា ក៏ដូចជាការទទួលទានអាហារនៅខាងក្រៅនៅភោជនីយដ្ឋានក៏ត្រូវបានហាមឃាត់ផងដែរ។ ទោះជាយ៉ាងណា បទបញ្ជាមិនអនុវត្តចំពោះពិធីសាសនាជាកាតព្វកិច្ចទេ។
ហាងសំខាន់ៗមួយចំនួនដូចជា ឱសថស្ថាន ដេប៉ូប្រេង ហាងលក់ទឹកដោះគោ ហាងលក់បន្លែ និងផ្លែឈើ ក៏ត្រូវបានលើកលែងពីការបញ្ជាឱ្យបិទមុនម៉ោង 8:00 យប់ជារៀងរាល់ថ្ងៃ។
តំបន់ហាមឃាត់រួមមាន Lahore, Multan, Faisalabad និង Gujranwala ។ ក្នុងចំណោមនោះ ទីក្រុង Lahore ត្រូវបានចាត់ថ្នាក់ដោយអង្គការ Swiss IQAir ជាទីក្រុងដែលមានគុណភាពខ្យល់អាក្រក់បំផុតក្នុងពិភពលោក អស់រយៈពេលជាច្រើនថ្ងៃជាប់ៗគ្នា។
ស្រុក Lahore, Multan, Faisalabad និង Gujranwala មានការកើនឡើងដែលមិនធ្លាប់មានពីមុនមកនៃចំនួនអ្នកជំងឺដែលទទួលរងពីជំងឺផ្លូវដង្ហើម រលាកភ្នែក និងបំពង់ក និងភ្នែកពណ៌ផ្កាឈូក។
ការហាមប្រាមនេះត្រូវបានចេញបន្ទាប់ពីមូលដ្ឋានខាងលើបានឃើញការកើនឡើងដែលមិនធ្លាប់មានពីមុនមកនៃករណីជំងឺទាក់ទងនឹងផ្លូវដង្ហើម ភ្នែក និងបំពង់ក។
កាលពីមុន នៅថ្ងៃចុងក្រោយនៃខែតុលា និងដើមខែវិច្ឆិកា ផ្លូវនានានៃទីក្រុង Lahore ក្នុងប្រទេសប៉ាគីស្ថាន ត្រូវបានគ្របដណ្តប់ដោយអ័ព្ទក្រាស់ លាយឡំនឹងធូលីដែលបំពុល ដោយប្រែក្លាយទីក្រុងនេះទៅជាកន្លែងបំពុលបំផុតមួយក្នុងពិភពលោក។ ខ្យល់អាកាសអាក្រក់កាន់តែខ្លាំងឡើងមិនត្រឹមតែគំរាមកំហែងដល់សុខភាពមនុស្សប៉ុណ្ណោះទេ ថែមទាំងប៉ះពាល់ផ្ទាល់ដល់ការងាររបស់កម្មកររាប់ពាន់នាក់ ជាពិសេសអ្នកដែលធ្វើការក្រៅផ្ទះ។
សន្ទស្សន៍គុណភាពខ្យល់ (AQI) នៅ Lahore បានឈានដល់កម្រិតប្រកាសអាសន្ន 507 ដែលជាកម្រិតខ្ពស់បំផុតនៅលើមាត្រដ្ឋាន ដោយមានការណែនាំដើម្បីកាត់បន្ថយសកម្មភាពក្រៅផ្ទះ។ បន្ថែមពីលើបទប្បញ្ញត្តិនៃការពាក់ម៉ាស់ជាកាតព្វកិច្ច រដ្ឋាភិបាលទីក្រុង Lahore បានធ្វើការកែសម្រួលម៉ោងសិក្សាដែលបានកំណត់រហូតដល់ខែមករា ឆ្នាំ 2025 ក៏ដូចជាការបញ្ឈប់សកម្មភាពក្រៅផ្ទះទាំងស្រុងផងដែរ៕ ដោយធីរីណា

រូប​ថត​: AP