ក្លិប Stade Rennais នៅលីកកំពូលបារាំង Ligue 1 បានតែងតាំងអតីតអ្នកចាត់ការសញ្ជាតិឈីលីលោក Jorge Sampaoli ជាគ្រូបង្វឹកថ្មីរបស់ខ្លួនដើម្បីជំនួសគ្រូបង្វឹកសញ្ជាតិបារាំងលោក Julien Stephan ក្នុងកិច្ចសន្យារហូតដល់ឆ្នាំ២០២៦។

ក្លិប Rennes បានបណ្តេញលោក Stephan ចេញពីតំណែងកាលពីថ្ងៃព្រហស្បតិ៍ បន្ទាប់ពីពួកគេបានឈ្នះការប្រកួតលីកចំនួន១០លើកដំបូងនៃរដូវកាលនេះ។ បន្ទាប់មកក្លិបត្រូវបានក្រុម Toulouse យកឈ្នះក្នុងលទ្ធផល 2-0 នៅលើទឹកដីខ្លួនឯងកាលពីថ្ងៃអាទិត្យ ក្រោមការដឹកនាំរបស់គ្រូបង្វឹកបណ្តោះអាសន្ន Sebastien Tambouret។

គ្រូបង្វឹកសញ្ជាតិអាហ្សង់ទីនលោក Sampaoli ធ្លាប់បានដឹកនាំក្រុម Chile ចន្លោះឆ្នាំ២០១២-២០១៦ ដោយបានឈ្នះពានរង្វាន់ Copa America ក្នុងឆ្នាំ២០១៥ ហើយត្រូវបានតែងតាំងជាគ្រូបង្វឹកឆ្នើមប្រចាំទ្វីបអាមេរិកខាងត្បូងក្នុងឆ្នាំដដែលនោះ។

គ្រូបង្វឹកវ័យ៦៤ឆ្នាំរូបនេះបានបង្វឹកក្រុមធំៗជាច្រើនរួមមាន Sevilla, Marseille និងក្រុមជម្រើសជាតិអាហ្សង់ទីន។ ការដឹកនាំចុងក្រោយរបស់គាត់គឺបានដឹកនាំក្លិប Flamengo របស់ប្រទេសប្រេស៊ីល។

នាយកប្រតិបត្តិក្លិប Rennes លោក Arnaud Pouille បាននិយាយនៅក្នុងសេចក្តីថ្លែងការណ៍មួយថា “Jorge និងបុគ្គលិករបស់គាត់មានចក្ខុវិស័យច្បាស់លាស់អំពីរបៀបដែលក្រុមគួរតែត្រូវបានរៀបចំឡើង ហើយក្រុមគ្រប់គ្រងកីឡាទាំងមូលចែករំលែកការវិភាគដូចគ្នានៃអ្វីដែលយើងត្រូវដាក់ឱ្យដំណើរការ។ សកម្មភាពសម្រាប់ការខិតខំ ទាមទារឱ្យមានការខិតខំប្រឹងប្រែង ភាពស្មោះត្រង់ និងការគោរពចំពោះមនុស្ស និងស្ថាប័ន”។

បច្ចុប្បន្នក្រុម Rennes ឈរនៅលេខរៀងទី១៣ ក្នុងលីកដោយមាន១១ពិន្ទុពីការប្រកួតចំនួន១១ ហើយបន្ទាប់នឹងទៅជួបក្រុមលេខ៤ Lille នៅថ្ងៃទី២៤ ខែវិច្ឆិកាខាងមុខ ៕ (រូបភាព ៖ CNA)