ភ្នំពេញ៖ ព្រឹកថ្ងៃទី១១ ខែសីហា ឆ្នាំ២០១៦ លោក នុត ពុធដារ៉ា អភិបាលខណ្ឌដង្កោ បានចូលរួមជាអធិបតីក្នុងពិធីបើកការដ្ឋានស្ថាបនាផ្លូវបេតុងចំនួន៣ខ្សែ ដោយប្រើប្រាស់គម្រោងមូលនិធិអភិវឌ្ឍន៍សង្កាត់ឆ្នាំ២០១៦ ក្នុងសង្កាត់សាក់សំពៅ ប្រទះឡាង និងសង្កាត់ក្រាំងពង្រ ដែលមានប្រវែងសរុប ១០០៦,៧ម៉ែត្រ។

លោក នុត ពុធដារ៉ា បានលើកឡើងអំពីការអភិវឌ្ឍហេដ្ឋារចនាសម្ព័ន្ធរូបវ័ន្ត ជាលំដាប់ពីមួយថ្ងៃទៅមួយថ្ងៃ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ការបើកការដ្ឋានស្ថាបនាផ្លូវបេតុងថ្មី៣ខ្សែ នាថ្ងៃនេះ ជាសក្ខីភាពស្រាប់។ ក្រោយការស្ថាបនារួចផ្លូវបេតុងនេះនឹងជួយសម្រួលដល់ការធ្វើដំណើរ ប្រកបរបរចិញ្ចឹមជីវិត និងបង្កការងាយស្រួលក្នុងការរស់នៅរបស់បងប្អូនប្រជាពលរដ្ឋនៅក្នុងមូលដ្ឋាន ជាពិសេសបងប្អូនដែលមានលំនៅដ្ឋាននៅតាមបណ្តោយផ្លូវទាំងនេះ។

លោកអភិបាលក៏បានសំណូមពរដល់បងប្អូនដែលរស់នៅតាមបណ្តោយផ្លូវដែលនឹងត្រូវស្ថាបនានេះ ឲ្យយោគយល់អធ្យាស្រ័យចំពោះផលប៉ះពាល់បន្តិចបន្តួចដែលបណ្តាលមកពីការស្ថាបនា។ ជាមួយគ្នាក៏ស្នើសុំឲ្យក្រុមហ៊ុនដែលទទួលការស្ថាបនា អនុវត្តគម្រោងឲ្យបានលឿន និងធ្វើឲ្យបានត្រឹមត្រូវតាមលក្ខណៈបច្ចេកទេស ដើម្បីជូនបងប្អូនប្រជាពលរដ្ឋប្រើប្រាស់បានយូរអង្វែង។

ផ្លូវបេតុងទាំង៣ ខ្សែដែលបានបើកការដ្ឋានស្ថាបនាក្នុងឱកាសនោះរួមមាន៖

– សង្កាត់សាក់សំពៅ ប្រវែង៣៦២ម៉ែត្រ ទទឹង៤ម៉ែត្រ កម្រាស់០,១៥ម៉ែត្រ ស្ថិតក្នុងភូមិក្រាំងតាផូ

– សង្កាត់ប្រទះឡាង ប្រវែង ៣៧៥ម៉ែត្រ ទទឹង៤ម៉ែត្រ កម្រាស់០,១៥ម៉ែត្រ ស្ថិតក្នុងភូមិគោកខ្សាច់

– សង្កាត់ក្រាំងពង្រ ប្រវែង ២៦៩,៧ម៉ែត្រ ទទឹង៤ម៉ែត្រ កម្រាស់០,១៥ម៉ែត្រ ស្ថិតក្នុងភូមិក្រាំងពង្រ និងភូមិក្រាំងស្វាយ៕

ដោយ៖ ជីម ភារ៉ា ដង្កោ