កាលពីថ្ងៃទី 19 ខែវិច្ឆិកា អ៊ុយក្រែនជាលើកដំបូងបានប្រើប្រាស់មីស៊ីលផ្លោងយុទ្ធសាស្ត្ររយៈចម្ងាយខ្លី (ATACMS) ដែលផ្តល់ដោយសហរដ្ឋអាមេរិក ដើម្បីវាយប្រហារយ៉ាងជ្រៅក្នុងទឹកដីរុស្ស៊ី។

ទីភ្នាក់ងារសារព័ត៌មាន Reuters បានដកស្រង់សម្តីយោធាអ៊ុយក្រែនថា កាំជ្រួច ATACMS បានវាយប្រហារឃ្លាំងអាវុធរុស្ស៊ី ដែលមានចម្ងាយប្រហែល 110 គីឡូម៉ែត្រពីតំបន់ព្រំដែន បណ្តាលឱ្យផ្ទុះឃ្លាំង។
ទន្ទឹមនឹងនេះ យោធារុស្ស៊ីបាននិយាយថា កាំជ្រួចរបស់អ៊ុយក្រែន ៥-៦ គ្រាប់ សំដៅលើមូលដ្ឋានយោធា ក្នុងតំបន់ Bryansk ត្រូវបានបាញ់ទម្លាក់។ បំណែកនៃគ្រាប់មីស៊ីល មួយបានធ្លាក់ចូលទៅក្នុងអគារនេះ បណ្តាលឲ្យមានអគ្គិភ័យ។ យ៉ាងណាក៏ដោយ អគ្គិភ័យត្រូវបានពន្លត់ភ្លាមៗ ហើយមិនបណ្តាលឲ្យមានមនុស្សរងគ្រោះ ឬខូចខាតអ្វីធ្ងន់ធ្ងរនោះទេ។
កាលពីដើមសប្តាហ៍នេះ ប្រធានាធិបតីអាមេរិកលោក Joe Biden បានយល់ព្រមឱ្យអ៊ុយក្រែនប្រើប្រាស់ ATACMS ដែលជាមីស៊ីលរយៈចម្ងាយឆ្ងាយបំផុតដែលសហរដ្ឋអាមេរិកផ្តល់ឱ្យអ៊ុយក្រែន ដើម្បីវាយប្រហារគោលដៅជ្រៅនៅក្នុងទឹកដីរុស្ស៊ី។
រដ្ឋមន្ត្រីការបរទេសរុស្ស៊ី លោក Sergei Lavrov បានព្រមានថា ការអនុញ្ញាតឱ្យអ៊ុយក្រែនប្រើប្រាស់ ATACMS មានន័យថា លោកខាងលិចចង់ឱ្យជម្លោះកាន់តែកើនឡើង។ ការវាយប្រហារនេះកើតឡើងក្នុងបរិបទនៃជម្លោះអ៊ុយក្រែននិងរុស្ស៊ីដែលមានរយៈពេល១.០០០ថ្ងៃ។ នេះគឺជាការវាយប្រហារលើកទីប្រាំរបស់អ៊ុយក្រែនដែលចូលជ្រៅក្នុងទឹកដីរុស្ស៊ី។
នេះធ្វើឱ្យមានការងឿងឆ្ងល់អំពីការគាំទ្ររបស់លោកខាងលិចចំពោះអ៊ុយក្រែននៅពេលដែលនៅសល់តែ 2 ខែប៉ុណ្ណោះដល់លោក Donald Trump ត្រលប់មកសេតវិមានជាផ្លូវការ។
កន្លងមក លោក Trump បានប្រឆាំងយ៉ាងខ្លាំងចំពោះការផ្តល់អាវុធដល់អ៊ុយក្រែន និងបានប្តេជ្ញាថានឹងបញ្ចប់សង្គ្រាមយ៉ាងពិតប្រាកដក្នុងរយៈពេល 24 ម៉ោងបន្ទាប់ពីលោកឡើងកាន់តំណែង។
ទោះបីជាយ៉ាងណាក៏ដោយ វាទំនងជាមិនមែនជាកត្តាដែលអាចសម្រេចលទ្ធផលនៃសង្រ្គាមដែលបានអូសបន្លាយរយៈពេល 1,000 ថ្ងៃនោះទេ ដោយសារតែអាវុធទាំងនេះបានទៅដល់កងទ័ពអ៊ុយក្រែនយឺតពេល។
ទីក្រុងវ៉ាស៊ីនតោនបានបញ្ជាក់ថា វាមិនភ្ញាក់ផ្អើលទេចំពោះការយល់ព្រមរបស់រុស្ស៊ីចំពោះគោលលទ្ធិនុយក្លេអ៊ែរថ្មី ហើយបានហៅទង្វើនេះថាជាការបង្ហាញពីការមិនទទួលខុសត្រូវលើផ្នែកនៃប្រទេសរុស្ស៊ី។
ទន្ទឹមនឹងនោះ លោក Zelensky បានចោទប្រកាន់ទង្វើថ្មីរបស់ប្រធានាធិបតីរុស្ស៊ី ពូទីន ថាបង្ហាញថាលោកមិនខ្វល់ពីសន្តិភាព៕ ដោយធីរីណា

រូប​ថត​: Reuters