ក្លិបបាល់ទាត់ញញួរធំ West Ham បានចំណាយទឹកប្រាក់២០,៥លានផោនដើម្បីទិញខ្សែប្រយុទ្ធអន្តរជាតិហ្គាណា Andre Ayew ពីក្រុម Swansea។

នេះគឺជាទឹកប្រាក់ច្រើនសន្ធឹកសន្ធាប់ មិនធ្លាប់មានពីមុនទេសម្រាប់ក្រុម West Ham ដែលហ៊ានចំណាយទិញកីឡាករ។ Andre Ayew បានចុះហត្ថលេខាលេងឲ្យ ក្រុម West Ham រយៈពេល៣ឆ្នាំ។ Andre Ayew ផ្លាស់មកកាន់ក្រុម Swansea ដោយគ្មានតម្លៃខ្លួនផ្ទេរនោះឡើយកាលពីរដូវ កាលមុន ដោយរូបគេបានស៊ុតបាល់បញ្ចូល ទីបាន១២គ្រាប់ក្នុងការបង្ហាញខ្លួន៣៤ ប្រកួត ។

ទិសដៅសំខាន់របស់ក្លិប West Ham ដែលដឹកនាំដោយលោកគ្រូបង្វឹក Slaven Bilic គឺចង់បានខ្សែប្រយុទ្ធ Alexandre Lacazette, Michy Batshuayi និង Carlos Bacca ប៉ុន្តែពួកគេសុទ្ធតែបដិសេធសំណើ សុំទិញរបស់ក្លិប West Ham ទើបក្រុម ញញួរធំសម្រេចយក Andre Ayew ។

Ayew បាននិយាយថា “ខ្ញុំមានមោទនភាពណាស់ដែលបានមកកាន់ក្លិបនេះ។ ខ្ញុំពិតជារីករាយដែលបានលេងឲ្យក្រុមអ្នកគាំទ្រមើលហើយសង្ឃឹមថាអ្នកគ្រប់គ្នានៅទីនេះនឹងសប្បាយចិត្ត។ ក្លិបនេះមានមហិច្ឆតាខ្ពស់ពិសេសមានគ្រូបង្វឹកល្អអស្ចារ្យដោយពួកគេចង់ក្លាយទៅជាក្លិបធំជារៀងរាល់ឆ្នាំ ដោយមានកីឡដ្ឋានថ្មីទៀតផងឆ្នាំនេះ”៕

ដោយ៖ ដេវីត