ភ្នំពេញ៖ លោកវរសេនីយ៍ឯក ហុង ពិសិដ្ឋ អធិការនគរបាលខណ្ឌកំបូល បានឱ្យដឹងនៅថ្ងៃទី២៧ ខែវិច្ឆិកា ឆ្នាំ២០២៤នេះថា កម្លាំងជំនាញខណ្ឌ បានធ្វេីការឃាត់ខ្លួនជនសង្ស័យចំនួន ០២នាក់ ស្ដីពីករណីប៉ុនប៉ងលួចមានស្ថានទម្ងន់ទោសដោយការប្រព្រឹត្តអំពើហិង្សា(ប្រើដាវកែច្នៃទុកកាប់យកម៉ូតូ) កាលពីថ្ងៃទី២៥ ខែវិច្ឆិកា ឆ្នាំ២០២៤ នៅចំណុចមុខដីវាល លេីមហាវិថីសុីជីនពីង ភូមិគោកខ្សាច់ សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ វេលាម៉ោងប្រហែល ០១ និង ៣០នាទី រំលងអាធ្រាត្រ។
លោកវរសេនីយ៍ឯក ហុង ពិសិដ្ឋ បានឱ្យដឹងទៀតថា ជនសង្ស័យចំនួន ០២នាក់ដែលត្រូវឃាត់ខ្លួននេះ ទី១.ឈ្មោះ សោម ធិ ភេទប្រុស អាយុ ១៨ឆ្នាំ មុខរបរមិនពិតប្រាកដ ស្នាក់នៅភូមិកាកាប២ សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ (ឃាត់ខ្លួន)(គ្មានសារធាតុញៀន)។
២.ឈ្មោះ ថន ចាន់ថា ភេទប្រុស អាយុ ១៨ឆ្នាំ មុខរបរមិនពិតប្រាកដ ស្នាក់នៅភូមិកាកាប២ សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ (ឃាត់ខ្លួន)(គ្មានសារធាតុញៀន)។
ចំណែកសម្ភារៈបន្សល់ទុក៖ ដាវកែច្នៃចំនួន ០១ដើម និងម៉ូតូចំនួន ០១គ្រឿង ម៉ាកហុងដា 125 ពណ៌ខ្មៅ ស៊េរី 2024 ពាក់ផ្លាកលេខ ភ្នំពេញ 1KO-1870 លេខតួនិងលេខម៉ាស៊ីន 0118864។
បច្ចុប្បន្នជនសង្ស័យខាងលើកំពុងឃាត់ខ្លួននៅអធិការដ្ឋាននគរបាលខណ្ឌកំបូល ដើម្បីកសាងសំណុំរឿង បញ្ជូនទៅតុលាការ ចាត់ការតាមនីតិវិធី៕
ដោយ៖ អរុណរះ
