ខេត្តពោធិ៍សាត់៖ កម្លាំងមូលដ្ឋានកងរាជអាវុធហត្ថក្រុងពោធិ៍សាត់ឃាត់ខ្លួនកូនជាងតោនរថយន្តម្នាក់ពីបទលួចម៉ូតូថៅកែរបស់ខ្លួន តាមពាក្យបណ្ដឹងរបស់ថៅកែជាងតោនរថយន្តម្នាក់ថា កូនជាងរូបនេះ បានលួចម៉ូតូរបស់គាត់ចំនួន១គ្រឿងរួចគេចខ្លួនបាត់អស់ប៉ុន្មានថ្ងៃហើយ ទើបតែឃើញបង្ហាញខ្លួនរួមទាំងវត្ថុតាងម៉ូតូដោះអាវចេញអស់ សង្ស័យបម្រុងបាញ់ថ្នាំពណ៌ផ្សេងដើម្បីបន្លំភ្នែក។
ការឃាត់ខ្លួនខាងលើនេះធ្វើឡើងកាលពីវេលាម៉ោង២រសៀលថ្ងៃទី១១ ខែសីហា ឆ្នាំ២០១៦ ត្រង់ចំណុចភូមិសូរិយាក្រោម សង្កាត់រលាប ក្រុង-ខេត្តពោធិ៍សាត់។
លោកអនុសេនីយ៍ឯក យ៉ង់ ស៊្រុន មេបញ្ជាការរងកងរាជអាវុធហត្ថក្នុងពោធិ៍សាត់ដឹកនាំកម្លាំងចុះប្រតិបត្តិការនេះបានឲ្យដឹងថា ជាងតោនរថយន្តដែលបានលួចម៉ូតូថៅកែខ្លួនត្រូវបានកម្លាំងឃាត់ចាប់ឈ្មោះ មៀត តយ ភេទប្រុស អាយុ ២៣ឆ្នាំ រស់នៅភូមិពាលញែក២ សង្កាត់ផ្ទះព្រៃ ក្រុង-ខេត្តពោធិ៍សាត។
លោកមេបញ្ជាការបន្តថា ក្នុងកិច្ចប្រតិបត្តិការឃាត់ចាប់ជនសង្ស័យរូបនេះកម្លាំងបានរកឃើញម៉ូតូ០១គ្រឿងម៉ាកយ៉ាម៉ាហា ពណ៌ស គ្នានស្លាកលេខ ប៉ុន្តែម៉ូតូនេះជនសង្ស័យបានដោះអាវច្រកចូលការ៉ុង និងទូរស័ព្ទដៃ០១គ្រឿងផងដែរ។
លោកបន្តទៀតថា ការឃាត់ចាប់ជនសង្ស័យរួមទាំងវត្ថុតាងម៉ូតូខាងលើនេះធ្វើឡើងក្រោយពីទទួលពាក្យបណ្ដឹងថៅកែជាងតោនរថយន្តម្នាក់ឈ្មោះ លឹម តៅឈាង ភេទប្រុស អាយុ៤៥ឆ្នាំ រស់នៅភូមិពាលញែក២ សង្កាត់ផ្ទះព្រៃ ក្រុង-ខេត្តពោធិ៍សាត់ ថា កូនជាងតោនរថយន្តគាត់ខាងលើនោះបានលួចម៉ូតូ០១គ្រឿងកាលពីយប់ថ្ងៃទី០៩ ខែសីហា ឆ្នាំ២០១៦ ប៉ុន្មានថ្ងៃមុននេះ រួចគេចខ្លួនរហូតទើបតែបង្ហាញមុខថ្ងៃចាប់ខ្លួននេះ ហើយនៅក្នុងពាក្យបណ្ដឹងម្ចាស់បណ្ដឹងពុំបានទាមទារសំណងអ្វីទេនោះទេ ពោលគឺសុំឲ្យសមត្តកិច្ចអនុវត្តតាមនីតិវិធី។
ករណីខាងលើនេះសមត្តកិច្ចកំពុងបំពេញសំណុំបែបបទដើម្បីបញ្ជូនខ្លួនជនសង្ស័យរួមទាំងវត្ថុតាម៉ូតូទៅទីបញ្ជាការដ្ឋានកងរាជអាវុធហត្ថខេត្តពោធិ៍សាត់ចាត់ការបន្ត៕
ដោយ៖ ប៉ឹម ពិន
