ភ្នំពេញ៖ មានគ្រោះថ្នាក់ចរាចរណ៍មួយបង្កឡើងដោយរថយន្ត ឡិចសុីសNX200T បើកបរដោយនារីម្នាក់ ទៅបុកបង្គោលស្លាកសញ្ញាបង្ហាញផ្លូវបាក់១ដើម រថយន្ដក្រឡាប់ផ្ងារជើង​ និងរងការខូចខាតយ៉ាងដំណំ។ ហេតុការណ៍នេះបានកើតឡើងកាលពីវេលាម៉ោង៤ ទៀបភ្លឺ ឈានចូលថ្ងៃទី០២ ខែធ្នូ ឆ្នាំ២០២៤ ស្ថិតនៅតាមបណ្តោយផ្លូវបឹងកក់ ទល់មុខរដ្ឋាករទឹកស្វ័យ័តក្រុងភ្នំពេញ សង្កាត់ស្រះចក ខណ្ឌដូនពេញ ។

យោងតាមប្រភពព័ត៌មានពីនារីម្ចាស់រថយន្តខាងលើបានឲ្យដឹងថាមុនពេលកើតហេតុ គាត់បានបើកបររថយន្ត ឡិចសុីសNX200T ពណ៌ស ធ្វើដំណើរឆ្លងកាត់បឹងកក់ លុះមកដល់ចំណុចផ្លូវកោង គាត់បានជ្រុះទូរស័ព្ទ ក៏អោនរើសទូរស័ព្ទ បណ្តាលឲ្យរេចង្កូតជ្រុលទៅបុកក្បាលនាគពុះចែកទ្រូងផ្លូវ ពេញទំហឹង បណ្តាលឲ្យក្រឡាប់រថយន្តភ្លាមៗតែម្តង ។
គួរបញ្ជាក់ថា ករណីគ្រោះថ្នាក់ចរាចរណ៍ខាងលើនេះ មិនបានបង្ករបួសស្នាមដល់អ្នកដទៃនោះទេ ជាក់ស្តែងគឺខូចខាតតែរថយន្តបង្កដែលក្រឡាប់ និងបង្គោលស្លាកសញ្ញាបង្ហាញផ្លូវតែប៉ុណ្ណោះ ចំណែកម្ចាស់រថយន្ត ក៏មិនមានរងរបួសនោះដែរ ។

ក្រោយពេលកើតហេតុនារីម្ចាស់រថយន្តបង្ក បានធ្វើការសងសំណងរាល់ការខូចខាតភ្លាមៗទៅកាន់ភាគីខាងគ្រប់គ្រងនៅក្នុងបឹងកក់ព្រមទាំងហៅរថយន្តស្ទូច ដើម្បីមកស្ទូចយករថយន្តរបស់ខ្លួនទៅជួសជុលដោយខ្លួនឯងផងដែរ ៕ដោយ​ ៖​ ភារ៉ា​ ដង្កោ