ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅព្រឹកថ្ងៃសុក្រទី២៧ ខែធ្នូ ឆ្នាំ២០២៤នេះ បពិត្រ សម្តេចព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត!
ក្នុងឱកាសដ៏មហានក្ខត្តឫក្សឧត្តុង្គឧត្តម នៃពិធីបុណ្យចូលឆ្នាំសកល ឆ្នាំ២០២៥ ដែលនឹងឈានចូល មកដល់ក្នុងវេលាដ៏ឆាប់ខាងមុខនេះ ជាបឋមទូលព្រះបង្គំជាខ្ញុំ និងភរិយា សូមព្រះបរមរាជានុញ្ញាតលំឱនកាយ វាចាចិត្ត ក្រាបបង្គំថ្វាយព្រះសព្ទសាធុការពរបវរសួស្តីសិរីមង្គលមហាប្រសើរ សូម សម្តេចព្រះមហាក្សត្រី ព្រះវររាជមាតាជាតិខ្មែរ ស្ដេចទ្រង់មានព្រះរាជសុខភាពល្អពេញបរិបូរណ៍ ព្រះពលានុភាពមាំទាំក្លៀវក្លា ព្រះឆន្ទៈមនសិការ ព្រះបញ្ញាញាណភ្លឺថ្លាឈ្លាសវៃ ព្រះទីឃាយុយឺនយូរជាងរយព្រះវស្សា ដើម្បីដើម្បីទ្រង់គង់ ប្រថាប់ជាម្លប់ដល់ប្រជានុរាស្ត្រ ជាកូន ចៅ ចៅទួត ចៅលួតរបស់ហ្លួងម៉ែជាអម្ចាស់ បានជ្រកកោនត្រជាក់ត្រជំ ចម្រុងចម្រើន សុខដុមរមនា ជាភិយ្យោភាពរៀងដរាបយូរអង្វែងតទៅ។
ក្នុងអភិលក្ខិតសម័យដ៏មានអត្ថន័យថ្លៃថ្លានេះ ទូលព្រះបង្គំជាខ្ញុំ និងភរិយា សូមព្រះបរមរាជានុញ្ញាត ដ៏ខ្ពង់ខ្ពស់បំផុត សម្តែងថ្វាយនូវសមានចិត្តគោរពស្រឡាញ់ កោតស្ញប់ស្ញែងជាអតិបរមា ចំពោះព្រះរាជកាយ វិការប្រកបដោយព្រះឆន្ទៈមនសិការដ៏មហាជ្រាលជ្រៅ និងព្រះព្រហ្មវិហារធម៌ដ៏ត្រជាក់ត្រជំឧត្តុង្គឧត្តមបំផុត ដែលជាព្រះមហាកិត្តិគុណបុណ្យរាជសម្ភាររបស់អង្គសម្តេចម៉ែជាអម្ចាស់ ដែលស្ដេចទ្រង់ខំសាងសន្សំ ហើយ ទ្រង់សព្វព្រះរាជហឫទ័យប្រោសព្រះរាជទានដល់ទូលព្រះបង្គំជាខ្ញុំ និងភរិយា ព្រមទាំងប្រជានុរាស្ត្រ ជាកូន ជាចៅ ចៅទួត ចៅលួតរបស់ព្រះអង្គគ្រប់កាលៈទេសៈ ពោរពេញដោយព្រះរាជហឫទ័យទូលំទូលាយជ្រះថ្លា ជាអនេកប្បការ។ បន្ថែមលើនេះ ហ្លួងម៉ែ ក៏តែងតែយកព្រះទ័យទុកដាក់យ៉ាងខ្លាំង ក្នុងការចូលរួមចំណែក បរិច្ចាគព្រះរាជទ្រព្យផ្ទាល់របស់ព្រះអង្គ ជួយទ្រទ្រង់ដល់សកម្មភាពរបស់កាកបាទក្រហមកម្ពុជា ការសាងសង់ អគារមន្ទីរពេទ្យ សាលារៀន ប្រឡាយទឹកជាដើម ដើម្បីជាប្រយោជន៍ក្នុងការរស់នៅរបស់ប្រជានុរាស្ត្រ។
តបចំពោះព្រះករុណាទិគុណ និងព្រះវិសុទ្ធគុណដ៏មហាធំធេងឧត្តុង្គឧត្តមនេះ ទូលព្រះបង្គំជាខ្ញុំ និង ភរិយា សូមវន្ទាឧទ្ទិសបួងសួងដល់វត្ថុស័ក្តិសិទ្ធិទាំងអស់ក្នុងលោក មានជាអាទិ៍ ដួងព្រះវិញ្ញាណក្ខន្ធអតីត ព្រះមហាក្សត្រ ព្រះមហាក្សត្រិយានីខ្មែរគ្រប់ព្រះអង្គ ព្រមទាំងទេវតារក្សាស្វេតច្ឆត្រ សូមព្រះអង្គអភិបាលគ្រង រក្សា សម្តេចព្រះមហាក្សត្រី ព្រះវររាជមាតាជាតិខ្មែរ សូមទ្រង់ព្រះប្រកបដោយព្រះពុទ្ធពរទាំង បួនប្រការគឺ៖ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។
សូម សម្តេចព្រះមហាក្សត្រី ព្រះវររាជមាតាជាតិខ្មែរ ជាអម្ចាស់ជីវិតលើត្បូង ទ្រង់ ប្រោសព្រះរាជមេត្តាទទួលនូវអភិវន្ទនកិច្ច និងកតញ្ញូតាធម៌ដ៏ខ្ពង់ខ្ពស់បំផុតពីទូលព្រះបង្គំជាខ្ញុំ និងភរិយា៕
ដោយ៖តារា
