ភ្នំពេញៈ យុវជនចំនួន៣នាក់ជិះម៉ូតូហុងដាឌ្រីមគេចពីក្មេងស្ទាវមួយក្រុមទៀតដែលកំពុងដេញវាយ បានជ្រុលទៅបុកម៉ូតូគុបជ្រុងដែលជិះដោយប្តីប្រពន្ធ២នាក់ បណ្តាលឱ្យម៉ូតូដួលអូសបុកចូលក្រោមគ្រែផ្ទះប្រជាពលរដ្ឋ រងរបួសធ្ងន់ស្រាលចំនួន៥នាក់។
ហេតុការណ៍នេះបានកេីតឡេីងនៅវេលាម៉ោង ៣និង៥០នាទីយប់រំលងអធ្រាត្រឈានចូលថ្ងៃទី២ ខែមករា ឆ្នាំ២០២៥ នៅចំណុចផ្លូវលេខ៤៣០កែងផ្លូវលេខ៤៣២ សង្កាត់ទំនប់ទឹក ខណ្ឌបឹងកេងកង ។
តាមប្រភពព័ត៌មានបានឱ្យដឹងថា មុនពេលកេីតហេតុគេបានឃើញប្តីប្រពន្ធ២នាក់ជិះម៉ូតូម៉ាកហុងដាគុបជ្រុងពណ៌ស្លែ ពាក់ស្លាកលេខ ភ្នំពេញ 1AW-8616 ធ្វើដំណើរតាមបណ្ដោយផ្លូវលេខ៤៣២ក្នុងទិសដៅពីលិចទៅកេីត លុះមកដល់ចំណុចកេីតហេតុក៏ស្រាប់តែមានយុវជន៣នាក់ជិះម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ 1JY -6982 ជិះបោះពួយតាមបណ្ដោយផ្លូវលេខ៤៣០ក្នុងទិសដៅពីជេីងទៅត្បូង លឿនក៏ជ្រុលទៅបុកម៉ូតូគុបជ្រុង បណ្ដាលអោយដួលខ្ទាតប្តីប្រពន្ធ២នាក់រងរបួសក្បាលត្រូវបានដឹកតាមម៉ូតូកង់បីយកទៅសង្គ្រោះនៅមន្ទីរពេទ្យ។
ដោយឡែកខាងម៉ូតូហុងដាឌ្រីមបានដួលអូសប្រហែល២០ម៉ែត្របុកចូលក្រោមគ្រែនៅមុខផ្ទះប្រជាពលរដ្ឋ រងការខូចខាត ព្រមទាំងធ្វើឱ្យអ្នកទាំង៣របួសដៃនិងជើងដេីរអត់រួច ត្រូវដឹកតាមម៉ូតូកង់បីយកទៅសង្គ្រោះនៅមន្ទីរពេទ្យដូចគ្នា ។
ករណីនេះផងដែរ ភាគីខាងម៉ូតូយុវជន បានឱ្យដឹងថា ពួកគេបានជិះម៉ូតូរត់គេចពីក្រុមក្មេងស្ទាវមួយក្រុមទៀតមានគ្នាជាង១០នាក់ពីម្តុំភ្លើងស្តុបបូកគោមក ហេីយភ័យស្លន់ស្លោក៏ជ្រុលទៅបុកម៉ូតូគុបជ្រុងដែលជិះដោយប្តីប្រពន្ធ២នាក់តែម្ដងទៅ។
ក្រោយពេលកេីតហេតុ នៅសល់តែមធ្យោបាយត្រូវសមត្ថកិច្ចជំនាញធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌបឹងកេងកង ដេីម្បីរង់ចាំដំណោះស្រាយ ៕
ដោយ៖សុខាសែនជ័យ
