ភ្នំពេញ៖ បុរសម្នាក់ជាជនជាតិបរទេស ត្រូវបានគេប្រទះឃើញស្លាប់ផ្លាប់មុខក្នុងថ្លុកឈាម ក្បែរកាំជណ្តើរនៃផ្លូវតូចមួយកន្លែងដោយមិនដឹងពីមូលហេតុ។ ករណីនេះបានបង្កការភ្ញាក់ផ្អើលកាលពីវេលាម៉ោង៧យប់ ថ្ងៃទី២ ខែមករា ឆ្នាំ២០២៥ ស្ថិតនៅចំណុចផ្លូវតូចក្បែរហាងលក់នំខេក១កន្លែង ក្នុងសង្កាត់ជ័យជំនះ ខណ្ឌដូនពេញ រាជធានីភ្នំពេញ។
តាមប្រភពព័ត៌មានពីយុវជនម្នាក់ដែលជាអ្នកលក់នំនៅហាងក្បែរទីតាំងកើតហេតុបានឱ្យដឹងថា មុនពេលកើតហេតុ មានជនជាតិបរទេសម្នាក់ដើរមកប្រាប់ពួកគាត់ថា គេបានប្រទះឃើញមានមនុស្សដួលបែកក្បាលហូរឈាមយ៉ាងច្រើននៅជាប់ហាងដែលគាត់ធ្វើការ។ ភ្លាមៗនោះគាត់និងបុគ្គលិកផ្សេងទៀតបាននាំគ្នាទៅអើតមើល ស្រាប់តែឃើញបុរសបរទេសម្នាក់ ដេកផ្កាប់មុខក្នុងសភាពជើងនៅខាងលើកាំជណ្តើរ ចំណែកក្បាលបោកនឹងឥដ្ឋការ៉ូនិងមានឈាមហូរយ៉ាងច្រើន។
ប្រភពបានបន្តថា ដោយឃើញមិនស្រួល គាត់បានទាក់ទងទៅកាន់ក្រុមគ្រូពេទ្យភ្លាមៗ ទើបមួយសន្ទុះក្រោយមកក៏មានរថយន្តសាមុយរបស់មន្ទីរពេទ្យព្រះអង្គឌួង បានមកដល់ទីតាំងកើតហេតុ និងមានក្រុមគ្រូពេទ្យចុះមកធ្វើការត្រួតពិនិត្យ តែជាអកុសលបុរសបរទេសខាងលើបានស្លាប់បាត់ទៅហើយ ។
ក្រោយពេលកើតហេតុ ក៏មានវត្តមានសមត្ថកិច្ចមូលដ្ឋានចុះមកបិទច្រកទីតាំងចេញចូលខាងលើ និងធ្វើកំណត់ហេតុ ព្រមទាំងទាក់ទងទៅកាន់សមត្ថកិច្ចជំនាញខាងកោសល្យវិច័យចុះមកពិនិត្យសពបុរសបរទេសខាងលើ ដើម្បីរកមូលហេតុនៃការស្លាប់និងរកអត្តសញ្ញាណសព ព្រមទាំងសាច់ញាតិជនរងគ្រោះ ៕
ដោយ ៖ ភារ៉ា ដង្កោ
