ខេត្តបន្ទាយមានជ័យ៖ ក្រសួងកសិកម្ម រុក្ខាប្រមាញ់និងនេសាទ នៅព្រឹកថ្ងៃពុធទី០៨ ខែមករា ឆ្នាំ២០២៥នេះ បានឱ្យដឹងថា លោក ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ រួមជាមួយ លោក ហុង ណារិត លោកស្រី អនុរដ្ឋលេខាធិការ លោក រុន សុផាន់ណារ៉ា អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្ត និងសហការី កាលពីម្សិលមិញនេះ បានចុះជួបកសិករបង្កបង្កើនផលស្រូវប្រាំង ក្នុងភូមិកោះពងសត្វ សង្កាត់កោះពងសត្វ ក្រុងសិរីសោភ័ណ ខេត្តបន្ទាយមានជ័យ។
ដំណើរចុះជួបនេះ ធ្វើឡើងក្នុងគោលបំណង ដើម្បីស្វែងយល់ពីការបង្កបង្កើនផលស្រូវប្រាំង និងការចងក្រងគ្នាជាក្រុមផលិត សម្រាប់ផ្គត់ផ្គង់ស្រូវជូនរោងម៉ាស៊ីនកិនស្រូវក្នុងស្រុក។
ក្នុងឱកាសនោះ លោករដ្ឋលេខាធិការ បានជំរុញឱ្យកសិករពិចារណា មកប្រើប្រាស់ពូជស្រូវក្រអូបក្នុងការបង្កបង្កើនផលដែលមានស្ថិរភាពថ្លៃជាងស្រូវដទៃទៀត ព្រមទាំងមានទីផ្សារនាំចេញច្បាស់លាស់ តាមរយៈផលិតកម្ម តាមកិច្ចសន្យារវាងក្រុមកសិករជាអ្នកផលិត និងរោងម៉ាស៊ីនកិនស្រូវក្នុងស្រុក៕
ដោយ៖តារា
