គ្រូបង្វឹកអន្តរជាតិអីុតាលីបានសម្តែងនូវក្តីរំភើបយ៉ាងខ្លាំងបំផុតពេលដែលក្លិបតោខៀវ Chelsea ទទួលបាន៣ពិន្ទុនៅថ្ងៃដំបូងក្នុងក្របខ័ណ្ឌអង់គ្លេស Premier League ដោយបានយកឈ្នះលើក្រុម West Ham ដោយលទ្ធផល២-១។

នៅក្នុងការប្រកួតនោះកីឡាករអន្តរ ជាតិបែលហ្ស៊ិក Eden Hazard អាចស៊ុត បាល់ពិន័យ១១ម៉ែត្របានសម្រេចនៅនាទី៤៧ ប៉ុន្តែកីឡាករ James Collins របស់ក្លិប ញញួរធំ West Ham ស៊ុតបាល់បានសម្រេច វិញនៅនាទី៧៧។ សល់តែ១នាទីជិតចប់ការប្រកួតក្រុមម្ចាស់ផ្ទះទទួលបាន៣ពិន្ទុដោយការស៊ុតបាល់បញ្ចូលទីរបស់ខ្សែ ប្រយុទ្ធអន្តរជាតិអេស្ប៉ាញ Diego Costa។

លោក Antonio Conte បានប្រាប់ សារព័ត៌មានកីឡា Sky Sports ថា “ក្រុមរបស់យើងលេងបានល្អ ហើយលោករំភើបខ្លាំងណាស់ចំពោះទម្រង់លេងរបស់ពួកគេ ។ អ្វីដែលសំខាន់នោះគឺស្វែងរក ស្មារតីត្រឹមត្រូវមួយសម្រាប់ក្រុម។ យើងដឹងថាយើងត្រូវការធ្វើឲ្យប្រសើជាងនេះហើយត្រូវការអភិវឌ្ឍច្រើនទៀត តែខ្ញុំរីករាយ នឹងក្រុមនេះណាស់ ។ កីឡាករ Eden Hazard ក៏លេងបានល្អដែរ ខ្ញុំពេញចិត្តយ៉ាងខ្លាំង ចំពោះទម្រង់លេងរបស់គាត់។ ពេលនេះយើងត្រូវត្រៀមលក្ខណៈសម្រាប់ការប្រកួតបន្ទាប់ទៀត”។

គួរបញ្ជាក់ថា គ្រូបង្វឹកវ័យ៤៧ឆ្នាំ Antonio Conte បានដឹកនាំក្រុមសេះបង្កង់ Juventus ឈ្នះជើងឯកអុីតាលី Serie A ចំនួន៣សម័យជាប់គ្នាហើយទើបតែលាលែងចេញពី តំណែងគ្រូបង្វឹករបស់ក្រុមជម្រើសជាតិ អីុតាលីដើម្បីដឹកនាំក្រុមតោខៀវ Chelsea នៅអង់គ្លេស៕

ដោយ៖ ដេវីត