ខេត្តស្វាយរៀង៖ សមត្ថកិច្ចឃាត់ខ្លួនជនសង្ស័យម្នាក់ករណីឃាតកម្មបណ្ដាលអោយបុរសម្នាក់ស្លាប់ ដោយមូលហេតុ ធ្លាប់មានរឿងឈ្លោះគ្នាជាច្រើនលើកជាមួយជនរងគ្រោះនៅស្រុកស្វាយជ្រំ។

យោងតាមលោកសោម សុភ័ណ្ឌ អធិការនគរបាលស្រុកស្វាយជ្រំបានអោយដឹងនាព្រឹកថ្ងៃទី១៧ខែមករាឆ្នាំ២០២៥នេះថា
ជនសង្ស័យមានឈ្មោះរ័ត្ន ណាគ្រី ភេទប្រុស អាយុ៤៦ឆ្នាំ ជនជាតិខ្មែរមុខរបរមិនពិតប្រាកដមានទីលំនៅភូមិពពារ ឃុំស្វាយធំ ស្រុកស្វាយជ្រំ ខេត្តស្វាយរៀង។

ចំណែកជនរងគ្រោះមានឈ្មោះ
រស់ សាវី ភេទប្រុស អាយុ៤៤ឆ្នាំ ជនជាតិខ្មែរ មុខរបរកសិករ រស់នៅភូមិពពារ ឃុំស្វាយធំ ស្រុកស្វាយជ្រំ ។
លោកអធិការបន្តថា នៅថ្ងៃទី១៦.ខែមករាឆ្នាំ២០២៥ វេលាម៉ោង៦និង៣០នាទីព្រលប់ ប៉ុស្តិ៍នគរបាលរដ្ឋបាលស្វាយធំ បានទទួលព័ត៌មានពីប្រជាពលរដ្ឋថា មានករណីឃាតកម្មមួយកើតឡើងនៅចំណុចភូមិពពារ ឃុំស្វាយធំ ស្រុកស្វាយជ្រំ បង្កដោយជនសង្ស័យបានផឹកស្រាស្រវឹង កាន់កាំបិតស្នៀតនិងដាវដើរទៅចាក់ជនរងគ្រោះឈ្មោះរស់ សាវី  ត្រូវចំនួន០២កាំបិត មួយកាំបិតត្រូវចំពោះ និងមួយកាំបិតទៀតត្រូវចំឆ្អឹងជំនីរខាងឆ្វេង បណ្តាលអោយរងរបួសធ្ងន់ បន្ទាប់មកបងប្អូនបានបញ្ជូនជនរងគ្រោះទៅមន្ទីរពេទ្យ ពេលដល់កណ្តាលផ្លូវជនរងគ្រោះបានស្លាប់។

ពេលទទួលព័ត៌មាននេះភ្លាម រូបលោក បានដឹកនាំកម្លាំងជំនាញស្រុកសហការជាមួយកម្លាំងប៉ុស្តិ៍នគរបាលរដ្ឋបាលស្វាយធំ និងកម្លាំងកងរាជអាវុធហត្ថស្រុកស្វាយជ្រំ ចុះដល់កន្លែងកើតហេតុ ធ្វើការស្រាវជ្រាវទើបដឹងថា ជនសង្ស័យពេលប្រព្រឹត្តបទល្មើសរួចហើយបានរត់គេចខ្លួនចូលទៅលាក់ខ្លួននៅក្នុងផ្ទះបងប្អូន បន្ទាប់មកសមត្ថកិច្ចយើងបានធ្វើការព័ទ្ធចាប់។ ប៉ុន្តែពេលនោះជនសង្ស័យមានដាវកាន់ជាប់និងដៃហើយក៏បានវាយផ្ទះបងប្អូនរបស់ខ្លួនបែកកញ្ចក់បង្អួច ទ្វារផ្ទះ និងសម្ភារប្រើប្រាស់ខូចខាតអស់មួយចំនួនទៀត ពេលសមត្ថកច្ចយើងព័ទ្ធចាប់ខ្លួន ជនសង្ស័យបានកាន់វត្ថុតាងកាំបិត ដាវនិងពូថៅ តបតរហូតដល់ម៉ោង២៣ៈ០០នាទី ទើបសមត្ថកិច្ចយើងចូលឃាត់ខ្លួនជនសង្ស័យបាន ភ្លាមនោះមានបងប្អូនជនរងគ្រោះនិងប្រជាពលរដ្ឋជាច្រើននាក់បានចូលមកវាយត្រូវជនសង្ស័យបណ្តាលអោយមានរបួសស្នាម។

លោកបន្ថែមថា មូលហេតុ: ជនសង្ស័យធ្លាប់មានរឿងឈ្លោះគ្នាជាច្រើនលើកជាមួយជនរងគ្រោះ។

ពេលឃាត់ខ្លួនសង្ស័យបានហើយលោកអធិការនគរបាលស្រុកស្វាយជ្រំ បានរាយការណ៍ជូនលោកឧត្តមសេនីយ៍ទោ ស្នងការ និងបានសុំយោបល់ឯកឧត្តម ខាំ សុផារី ព្រះរាជអាជ្ញាអមសាលាដំបូងខេត្តស្វាយរៀងឃាត់ខ្លួនជនសង្ស័យនៅអធិការដ្ឋាននគរបាលស្រុកស្វាយជ្រំ កសាងសំណុំរឿងចាត់ការតាមច្បាប់៕

ដោយ៖ សុថាន