ក្លិបយក្សរបស់ប្រទេសអេស្ប៉ាញ Real Madrid បានធ្វើពិធីបង្ហាញខ្សែប្រយុទ្ធអន្តរជាតិអេស្ប៉ាញ Alvaro Morata ជាផ្លូវការ បន្ទាប់ពីទិញពីក្លិប Juventus ក្នុងតម្លៃខ្លួន ២៣លានផោន ។

Alvaro Morata ត្រូវបានក្លិប Real Madrid លក់ទៅឲ្យក្រុមសេះបង្កង់ Juventus នៅក្នុងឆ្នាំ២០១៤ ហើយរូបគេបានបញ្ចេញថ្វីជើងគួរឲ្យចាប់អារម្មណ៍បំផុតជួយក្រុមសេះបង្កង់ឈ្នះជើងឯកអ៊ីតាលី២សម័យជាប់ៗគ្នា ។

ក្រោយពេលទទួលបានកីឡាករវ័យ ២៣ឆ្នាំនេះត្រឡប់មកវិញក៏មានព័ត៌មានលេចឮថា ក្លិប Real Madrid នឹងលក់ Alvaro Morata ទៅកាន់ក្លិបផ្សេងទៀតដើម្បីទទួលបានប្រាក់ចំណេញច្រើន តែពេលនេះពួកគេបានដាក់បង្ហាញជាផ្លូវការហើយ ដោយ មានការបញ្ជាក់ពីលោក Zinedine Zidane គ្រូបង្វឹករបស់ក្រុម Real Madrid ថា រូប គេនឹងមិនចាកចេញទៅណានោះទេ ។

Morata បានថ្លែងនៅក្នុងថ្ងៃបង្ហាញខ្លួនជាផ្លូវការរបស់ខ្លួនថា “នេះគឺជាថ្ងៃអស្ចារ្យបំផុតសម្រាប់ខ្ញុំដែលបានវិលត្រលប់មក ផ្ទះវិញ។ ខ្ញុំរង់ចាំការវិលត្រឡប់មកវិញនេះអស់រយៈពេល២ឆ្នាំហើយ។ ខ្ញុំសូមអរគុណដល់អ្នកដែលបានទុកចិត្តមកលើខ្ញុំ”។

ទោះបីជាត្រូវប្រជែងយកតំណែងជម្រើសដំបូងពីកីឡាករសំខាន់ៗដូចជា Karim Benzema, Gareth Bale និង Cristiano Ronaldo ក៏ដោយក៏កីឡាករAlvaro Morata នៅតែបង្ហាញពីជំនឿចិត្តថា រូបគាត់ពិតជាអាចចូលរួមចំណែកក្នុងការជួយក្រុមឲ្យ ទទួលបានជោគជ័យដោយសារតែក្នុងវិស័យបាល់ទាត់ត្រូវការមិត្តរួមក្រុមធ្វើការងារជាក្រុមមិនដូចលេងតឺន្នីសនិងលេងអុកនោះទេ៕

ដោយ៖ ដេវីត