ក្លិប Chicago Fire កំពុងពិភាក្សាលើការផ្លាស់ប្តូរដ៏គួរឱ្យភ្ញាក់ផ្អើលមួយដើម្បីនាំយកខ្សែប្រយុទ្ធសញ្ជាតិប្រេស៊ីល Neymar ទៅកាន់ Major League Soccer ដែលជាលីកកំពូលរបស់អាមេរិក។ កីឡាករវ័យ៣២ឆ្នាំនឹងផុតកុងត្រាជាមួយក្លិបអារ៉ាប៊ីសាអ៊ូឌីត Al-Hilal នៅរដូវក្តៅក្រោយរយៈពេល២ឆ្នាំនៅ Saudi Pro League។
ក្លិប Chicago Fire នឹងអាចធ្វើឱ្យកិច្ចព្រមព្រៀងដំណើរការទៅមុខ ហើយការចរចាកំពុងបន្តជាមួយនឹងអ្នកតំណាងរបស់ Pro League និង Neymar ប៉ុន្តែប្រភពបានប្រាប់ BBC Sport ថាការផ្ទេរនេះគឺមិនទាន់រួចរាល់ទេ ហើយនៅតែមានភាពស្មុគស្មាញ។
Neymar មិនទាន់អាចបង្ហាញខ្លួនសម្រាប់ពាក់កណ្តាលទីពីរនៃរដូវកាលលីកអារ៉ាប៊ីសាអ៊ូឌីត ហើយឥឡូវនេះអាស្រ័យលើកីឡាករក្នុងការសម្រេចចិត្តលើកន្លែងដែលគាត់ចង់លេង។ ទីផ្សារដោះដូរកីឡាករនៅ MLS នឹងចាប់បើកពីថ្ងៃទី៣១ ខែមករា រហូតដល់ថ្ងៃទី២៣ ខែមេសា។
Chicago Fire មាន Neymar នៅក្នុងបញ្ជីសម្រាំងរបស់ពួកគេ ដែលក្លិបនេះអាចមានកីឡាកររហូតដល់ទៅ៥នាក់ក្នុងបញ្ជី ដែលមានន័យថា គ្មានភាគីផ្សេងទៀតក្នុងលីកណាអាចនិយាយជាមួយ ឬចុះហត្ថលេខាជាមួយ Neymar លុះត្រាតែ Chicago Fire យល់ព្រម។
Neymar បានចូលរួមជាមួយ Al-Hilal ពី Paris St-Germain ក្នុងឆ្នាំ២០២៣ ក្នុងតម្លៃកំណត់ត្រាលីកចំនួន៧៧លានផោន ប៉ុន្តែគាត់បានបង្ហាញខ្លួនត្រឹមតែ៧ដងប៉ុណ្ណោះ ដោយស៊ុតបញ្ចូលទីបាន១គ្រាប់។ អតីតខ្សែប្រយុទ្ធក្រុម Barcelona រូបនេះបានរងរបួសសរសៃពួរជង្គង់របស់គាត់នៅក្នុងខែតុលា ឆ្នាំ២០២៣ ដែលបានធ្វើឱ្យគាត់អវត្តមានរយៈពេល១ឆ្នាំ។
អតីតមិត្តរួមក្រុម Barcelona កីឡាករ Lionel Messi និង Luis Suarez កំពុងលេងក្នុងលីក MLS ជាមួយក្រុម Inter Miami ដែលបានឈ្នះពានរង្វាន់ Eastern Conference កាលពីរដូវកាលមុន។
Al-Hilal គឺជាក្រុមកំពូលតារាងនៃ Pro League ដោយនាំមុខក្រុម Al-Ittihad លើគ្រាប់បាល់ស៊ុតបញ្ចូលទី បន្ទាប់ពីយកឈ្នះ Al-Fateh ៩-០ កាលពីថ្ងៃព្រហស្បតិ៍។ បច្ចុប្បន្នកីឡាករ Aleksandar Mitrovic, Ruben Neves និង Joao Cancelo សុទ្ធតែលេងឱ្យ Al-Hilal។
លោក Jorge Jesus អ្នកចាត់ការទូទៅរបស់ក្លិប Al-Hilal បានបញ្ជាក់ថា Neymar នឹងមិនត្រូវបានចុះឈ្មោះលេងឲ្យលីកនោះទេ ដោយដាក់កម្រិតគាត់ឱ្យលេងតែការប្រកួត Asian Champions League ប៉ុណ្ណោះសម្រាប់រដូវកាលដែលនៅសល់។ គាត់មិនត្រូវបានរាប់បញ្ចូលក្នុងក្រុមសម្រាប់ពាក់កណ្តាលដំបូងនៃយុទ្ធនាការនោះទេ។
Neymar ដែលបានឈ្នះពាន La Liga ពីរលើក និង Champions League ជាមួយ Barcelona និងពាន Ligue 1 ៥ដងជាមួយ PSG នៅផ្លូវបំបែកក្នុងអាជីពរបស់គាត់។ ការផ្លាស់ទៅប្រទេសអារ៉ាប៊ីសាអ៊ូឌីតនេះ អាចជាការបាត់បង់កេរឈ្មោះសម្រាប់ខ្សែប្រយុទ្ធប្រេស៊ីលរូបនេះក៏ថាបាន ខណៈដែលខ្សែប្រយុទ្ធរូបនេះស៊ុតបញ្ចូលទីបាន១២៨គ្រាប់ដែលជាកំណត់ត្រាស៊ុតបញ្ចូលទីច្រើនជាងគេបំផុតចំនួន៧៩គ្រាប់របស់ប្រទេសរបស់គាត់៕
(រូបភាព ៖ BBC)
