ភ្នំពេញ៖ បើករថយន្ដមិនប្រយ័ត្ន ក៏ទៅបុកជាមួយរថយន្ដកូរ៉េដឹកគោត្រង់ចំណុចផ្លូវបំបែកជាបួន បណ្ដាលអោយរថយន្ដទាំង២គ្រឿងខូចខាតផ្នែកពីមុខយ៉ាងដំណំ។ ហេតុការណ៍គ្រោះថ្នាក់ចរាចរណ៍នេះបង្កការភ្ញាក់ផ្អើលកាលពីវេលាម៉ោង៩ និង៣០នាទីព្រឹក ថ្ងៃទី២២ ខែមករា ឆ្នាំ២០២៥ ស្ថិតត្រង់ចំណុចផ្លូវបរិវេណOCIC សង្កាត់ជ្រោយចង្វារ ខណ្ឌជ្រោយចង្វារ ។
យោងតាមប្រភពព័ត៌មានពីកៃកុងរថយន្ដកូរ៉េដឹកគោ ពណ៌ខៀវ ពាក់ផ្លាកលេខ ធ០៤៤៥ ភព២ បានឱ្យដឹងថា មុនពេលកើតហេតុ គាត់បានបើករថយន្ដខាងលើ គោលបំណងដឹកគោដាក់អោយម៉ូយត្រង់ចំណុចមាត់ទន្លេ ជិតនិងស្ពានម៉ាឡេ បានធ្វើដំណើរតាមផ្លូវបេតុងក្នុងបរិវេណOCIC ទិសដៅពីកើតមកលិចក្នុងល្បឿនយឺតនោះទេ ។ លុះធ្វើដំណើរដល់ចំណុចកើតហេតុខាងលើផ្លូវបំបែជាបួន ក៏ស្រាប់តែមានរថយន្ដម៉ាកតូយ៉ូតាព្រូសមួយគ្រឿង ពណ៌ស ពាក់ផ្លាកលេខភ្នំពេញ 2BH-8199 បានធ្វើដំណើរតាមផ្លូវអភិវឌ្ឍន៍ ទិសដៅពីជើងមកត្បូងក្នុងល្បឿនលឿន ក៏ទៅបុករថយន្ដកូរ៉េដឹកគោ ខាងលើបណ្ដាលឱ្យរងការខូតខាតផ្នែកពីមុខរថយន្ដទាំង២គ្រឿងយ៉ាងដំណំ ។សំណាងល្អក្នុងហេតុការណ៍គ្រោះថ្នាក់ខាងលើនេះមិនមានមនុស្សរឺក៏សត្វគោរបួសនោះឡើយ។
ក្រោយមកដោយសារតែភាគីទាំង២ដោះស្រាយគ្នាមិនត្រូវ ក៏សមត្ថកិច្ចមូលដ្ឋានទាក់ទងទៅសមត្ថកិច្ចជំនាញចរាចរណ៍ធ្វើការវាសវែង ស្ទូចរថយន្តទាំង២គ្រឿងទៅរក្សាទុកអធិការដ្ឋាននគរបាលខណ្ឌជ្រោយចង្វារដើម្បីរងចាំដោះស្រាយនៅពេលក្រោយ ៕
ដោយ ៖ ភារ៉ា ដង្កោ
