ភ្នំពេញ៖ ស្នងការដ្ឋាននគរបាលរាជធានីភ្នំពេញ នៅព្រឹកថ្ងៃចន្ទទី២៧ ខែមករា ឆ្នាំ២០២៥នេះ បានបង្ហាញពីសកម្មភាពរបស់ប្រជាពលរដ្ឋអគុណសមត្ថកិច្ចខណ្ឌពោធិ៍សែនជ័យដែលបានរកឃើញនិងប្រគល់ម៉ូតូជូនគាត់វិញក្រោយចោរលួចបាត់ទៅ។
ជាក់ស្ដែងកម្លាំងនគរបាលខណ្ឌពោធិ៍សែនជ័យ កាលពីរសៀលថ្ងៃទី២៦ ខែមករា ឆ្នាំ២០២៥ វេលាម៉ោង១៤ និង៣០នាទី បានធ្វើការប្រគល់ម៉ូតូជូន ជនរងគ្រោះ
-ឈ្មោះ ប៉ាត ទីជីង ភេទប្រុស អាយុ១៨ឆ្នាំ មុខរបរសិស្ស ទីលំនៅភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ ដែលបានបាត់កាលពីថ្ងៃទី០៣ ខែធ្នូ ឆ្នាំ២០២៤ នៅចំណុចចំណតម៉ូតូហាងមីហិរ JEJU ភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិសែនជ័យ ។
ប្រភពដដែលបន្តថា ក្នុងប្រតិបត្តិការនោះដែរ កម្លាំងសមត្ថកិច្ចជំនាញ បានឃាត់ខ្លួនជនសង្ស័យឈ្មោះ ប៊ុន ខេន ភេទប្រុស អាយុ៣៧ឆ្នាំ មុខរបរ និងទីលំនៅមិនពិតប្រាកដ ។
ចំណែកម៉ូតូប្រគល់ជូនជនរងគ្រោះវិញម៉ាកហុងដា សេ១២៥ ពណ៍ខ្មៅ ផលិតឆ្នាំ២០១១ ពាក់ស្លាកលេខ សៀមរាប 1J-8880 ។
បច្ចុប្បន្នជនសង្ស័យខាងលើ សមត្ថកិច្ចបានកសាងសំណុំរឿងតាមនីតិវិធី៕
ដោយ៖តារា
