ខេត្តមណ្ឌលគិរី៖ ក្រសួងកសិកម្ម រុក្ខាប្រមាញ់និងនេសាទ នៅព្រឹកថ្ងៃព្រហស្បតិ៍ទី២០ ខែកុម្ភៈ ឆ្នាំ២០២៥នេះ បានឱ្យដឹងថា រយៈពេលពីរថ្ងៃ ពោលគឺចាប់ពីថ្ងៃទី១៨-១៩ ខែកុម្ភៈ ឆ្នាំ២០២៥ លោក ឈុំ ឆុនលី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោក ហាន សុភក្ដិ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី និងមន្រ្តីជំនាញ បានចុះពិនិត្យការងារកសិកម្ម និងដំណាំឧស្សាហកម្ម ប្រជាកសិករនៅក្រុងសែនមនោរម្យ និងស្រុកកែវសីមា ខេត្តមណ្ឌលគិរី។
ដំណើរបេសសកម្មនោះ លោកអនុរដ្ឋលេខាធិការ បានជួបសំណេះសំណាលជាមួយប្រជាកសិករ ដែលដាំដុះដំណាំឧស្សាហកម្ម និងបានវាយតម្លៃឃើញថា ខេត្តមណ្ឌលគិរី មានវឌ្ឍនភាពលើដំណាំស្វាយចន្ទី ម្រេច កាហ្វេ និងកាកាវ គួរឱ្យកត់សម្គាល់។
ទន្ទឹមនឹងនេះ លោកអនុរដ្ឋលេខាធិការ បានគូសបញ្ជាក់ដល់កសិករឱ្យយកចិត្តទុកដាក់ក្នុងការពិនិត្យ តាមដានមើលស្ថានភាពសត្វល្អិតចង្រៃ ជុំវិញតំបន់ដាំដុះរបស់ខ្លួនឱ្យបានជាប់លាប់ និងច្បាស់លាស់ ពីព្រោះរដូវកាលនេះជារដូវកាលប្រមូលផលដំណាំស្វាយចន្ទី និងម្រេច។ ជាពិសេសគួរអនុវត្តតាមការណែនាំ របស់មន្រ្ដីជំនាញនៃក្រសួងកសិកម្ម រុក្ខាប្រមាញ់ និងនេសាទ ក៏ដូចជាមន្ទីរកសិកម្ម រុក្ខាប្រមាញ់ និងនេសាទខេត្ត ដើម្បីធានាបានដល់កម្រិតអតិបរមានូវទិន្នផលផលិតកម្ម ដំណាំឧស្សាហកម្មរបស់គាត់ឱ្យកាន់តែមានការវិវឌ្ឍន៍ឈានឡើងជាលំដាប់ទាំងបរិមាណ និងគុណភាព។
ជាចុងបញ្ចប់ លោក ឈុំ ឆុនលី បានណែនាំឱ្យកសិករប្រើប្រាស់ពូជស្វាយចន្ទី របស់ជាតិដែលបានចុះបញ្ជីរួចហើយមានដូចជា៖ ពូជអ៊ឹម-២៣ ហាស-០៩ អ៊ឹម-១០ និងពូជអ៊ឹម-៤ ជាដើម ។ ជាមួយគ្នានោះ លោក ក៏បានផ្តល់អនុសាសន៍ ដល់កសិករដែលដាំដំណាំស្វាយចន្ទី ម្រេច កាហ្វេ និងកាកាវ គួរពិចារណា ក្នុងការចងក្រងគ្នាបង្កើតជាសហគមន៍កសិកម្មទំនើប ដែលនឹងទទួលបានអត្ថប្រយោជន៍ច្រើន ហើយស្របទៅនឹងគោលនយោបាយអភិវឌ្ឃន៍វិស័យកសិកម្ម របស់រាជរដ្ឋាភិបាលនៅអាណតិ្តទី៧នេះ៕
ដោយ៖តារា
