ខេត្តសៀមរាប៖ នៅព្រឹកថ្ងៃទី២៧ ខែកុម្ភៈឆ្នាំ ២០២៥ ពិធីបាញ់គ្រាប់ពិតអាវុធ AK47 ដល់ពលទាហានហ្វឹកហ្វឺនឆ្នាំ២០២៤ កងពលធំអន្តរាគមន៍លេខ២ ដែលប្រព្រឹត្តទៅស្ថិតក្នុងភូមិសាស្ត្រភ្នំខ្យងVA (៣១-២៨) ភូមិរុងរឿង ឃុំកន្ទួត ស្រុកស្វាយលើ ខេត្តសៀមរាប ក្រោមអធិបតីភាព លោក ឧត្តមសេនីយ៍ឯក កែវ ធីមេបញ្ជាការ រង កងទ័ព ជើង គោក មេបញ្ជាការ កងពលធំអន្តរាគមន៍លេខ២។

       តាមរបាយការណ៍ហ្វឹកហ្វឺនបានឲ្យដឹងថា ការអនុវត្តន៍បាញ់គ្រាប់ពិតនេះមានរយះពេល១ព្រឹក ដែលមានសិក្ខាកាម សរុបចំនួន ៩៧នាក់ ទទួលបានលទ្ធផលដូចខាងក្រោម៖

    -និទ្ទេសពូកែ ចំនួន     ១៥នាក់ ស្មើនឹង ១៦%

    -និទ្ទេសគ្រាន់បើ ចំនួន  ៤៧នាក់ ស្មើនឹង ៤៨%

    -និទ្ទេសមធ្យម ចំនួន    ៣៥នាក់ ស្មើនឹង ៣៦%

 

ក្នុងឱកាសនេះដែរ លោក មេបញ្ជាការបានមាន ប្រសាសន៍ថា ៖  ចាប់ពីពេលហ្វឹកហ្វឺនរហូតមកដល់ថ្ងៃនេះបានអនុវត្តន៍ការបាញ់គ្រាប់ពិតកាំភ្លើងAK47 សម្រេចបានលទ្ធផលជោគជ័យល្អប្រសើរ ទាំងបច្ចេកទេសអាវុធ និងកាយវិការបាញ់។

     

ទន្ទឹមនឹងនេះ លោកមេបញ្ជាការ ក៏បានរំលឹកដាស់តឿនដល់សិក្ខាកាមទាំងអស់ត្រូវតែហ្វឹកហាត់រៀនសូត្រជាប់ជានិច្ច《ស៊ូបង្ហូរញើសនៅលើទីលាន  ប្រសើរជាងបង្ហូរឈាមលើសមរភូមិ》។ ជាមួយគ្នានោះ ឯកឧត្ដម បានលើកទឹកចិត្តជូនរង្វាន់ដល់ពលទាហានដែលមានស្នារដៃ និទ្ទេសពូកែផងដែរ ជាចុងបញ្ចប់ លោក  មេបញ្ជាការ បានថ្លែងអំណរគុណ កោតសរសើរចំពោះយោធិនដែលបំពេញការងារទទួលបានលទ្ធផលល្អ និងជោគជ័យគ្រប់ភារកិច្ចដែលថ្នាក់លើបានប្រគល់ជូនផងដែរ ៕

ដោយ ៖ សិលា