សហព័ន្ធបាល់ទាត់ពិភពលោក FIFA បានលុបចោលការព្យួរសហព័ន្ធបាល់ទាត់ប៉ាគីស្ថាន (PFF) បន្ទាប់ពីប្រទេសនេះបានអនុម័តវិសោធនកម្មរដ្ឋធម្មនុញ្ញដែលមានសុពលភាពទាក់ទងនឹងកីឡាបាល់ទាត់ ដែលមានការពិនិត្យដោយស្ថាប័នគ្រប់គ្រងបាល់ទាត់ពិភពលោក និងសហព័ន្ធបាល់ទាត់អាស៊ី (AFC) ។

PFF បានអនុម័តវិសោធនកម្មនៅក្នុងសមាជវិសាមញ្ញក្នុងទីក្រុង Lahore កាលពីថ្ងៃព្រហស្បតិ៍ កន្លងទោ ដោយបំពេញនូវតម្រូវការសម្រាប់ការបញ្ចប់ការព្យួរដែលកំណត់ដោយ FIFA កាលពីខែមុន។

FIFA បានប្រកាសនៅក្នុងសេចក្តីថ្លែងការណ៍មួយថា “ការិយាល័យក្រុមប្រឹក្សា FIFA បានសម្រេចចិត្តនៅថ្ងៃទី២ ខែមីនា ឆ្នាំ២០២៥ ដើម្បីលុបចោលការព្យួរដែលត្រូវបានដាក់លើសហព័ន្ធកីឡាបាល់ទាត់ប៉ាគីស្ថាន (PFF) នៅថ្ងៃទី៦ ខែកុម្ភៈ ឆ្នាំ២០២៥”។

FIFA បានព្យួរ PFF កាលពីឆ្នាំ២០១៧ និងឆ្នាំ២០២១ ដោយសារតែការជ្រៀតជ្រែកពីភាគីទី៣។ ការហាមឃាត់ចុងក្រោយត្រូវបានលុបចោលនៅក្នុងខែមិថុនា ឆ្នាំ២០២២ បន្ទាប់ពីគណៈកម្មាធិការធ្វើឱ្យមានលក្ខណៈធម្មតារបស់ PFF បានអះអាងថា ខ្លួនបានទទួលការគ្រប់គ្រងពេញលេញនៃបរិវេណ និងហិរញ្ញវត្ថុរបស់សហព័ន្ធឡើងវិញ។

PFF បានបង្ហោះនៅលើ X ថា “យើងសូមថ្លែងអំណរគុណដល់ FIFA និង AFC សម្រាប់ការគាំទ្ររបស់ពួកគេចំពោះកីឡាបាល់ទាត់ប៉ាគីស្ថាន និងសូមចូលរួមអបអរសាទរយ៉ាងស្មោះស្ម័គ្រចំពោះសហគមន៍បាល់ទាត់ប៉ាគីស្ថាន” ៕