ភ្នំពេញ: បុរសម្នាក់បានរងរបួសធ្ងន់ខណៈបេីកឡំប្រឺតាងោកមួយភាំងជ្រុលទៅបុកពីក្រោយរថយន្តប្រមូលសំរាមដែលកំពុងតែឈប់យកសំរាម ត្រូវបានប្រជាពលរដ្ឋដឹកយកទៅសង្គ្រោះបន្ទាន់នៅមន្ទីរពេទ្យភ្លាមៗ ។
ហេតុការណ៍គ្រោះថ្នាក់ចរាចរណ៍នេះបានកេីតឡើងនៅវេលាម៉ោង១រំលងអធ្រាត្រឈានចូលថ្ងៃទី០៧ ខែមីនា ឆ្នាំ២០២៥ ស្ថិតនៅតាមបណ្ដោយផ្លូវវេងស្រេង ទល់មុខស្ពាយ ឌ័រ ក្លឹ ភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យរាជធានីភ្នំពេញ។
ប្រភពព័ត៌មានពីពលរដ្ឋបានឱ្យដឹងថា នៅមុនពេលកេីតហេតុគេឃើញរថយន្តប្រមូលសំរាមក្រុមហ៊ុន MIZUDA ពណ៌សពាក់ស្លាកលេខAT25.3.1927 ឈប់នៅចំណុចខាងលើដើម្បីប្រមូលសំរាមដាក់លើរថយន្ត ពេលនោះស្រាប់តែគេឃើញបុរសម្នាក់បេីកបរឡំប្រឺតា ពណ៌លឿងពាក់ស្លាកលេខកណ្ដាល1Y-3457 ពីរនាក់ប្រពន្ធធ្វើដំណើរតាមបណ្ដោយផ្លូវវេងស្រេងក្នុងទិសដៅពីកេីតមកលិចក្នុងល្បឿនលឿនបានជ្រុលចង្កូតទៅបុកពីក្រោយរថយន្តដឹកសំរាមពេញទំហឹងបណ្ដាលឱ្យគាបជាប់រងរបួសបាក់ជើង។ ភ្លាមៗនោះពលរដ្ឋនៅទីតាំងកេីតហេតុឃើញបាននាំគ្នាជួយគាស់ទាញយកចេញរួចហើយប្រពន្ធបុរសរងគ្រោះបានហៅឡំប្រឺតាដឹកយកប្ដីរបស់ខ្លួនទៅសង្គ្រោះបន្ទាន់ភ្លាមៗនៅមន្ទីរពេទ្យឯកជន។
បន្ទាប់ពីកេីតហេតុដោយសារជនរងគ្រោះរងរបួសធ្ងន់ធ្ងរពេកមិនអាចដោះស្រាយបានខាងសមត្ថកិច្ចមូលដ្ឋានបានទាក់ទងទៅសមត្ថកិច្ចជំនាញចរាចរណ៍ចុះមកវាស់វែងយករថយន្តដឹកសំរាម និងឡំប្រឺតាទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យ រង់ចាំដោះស្រាយគ្នានៅពេលក្រោយ ៕
ដោយ៖ ជ្រោយពេជ្រ
