🔴តើពិតទេ? លោកអនុសេនីយ៍ឯក សែម សុខុម ជំនួយការលោកស្នងការនគរបាលខេត្តបាត់ដំបង ជាអ្នកកាងបនល្បែងស៉ីសងខុសច្បាប់គ្រប់ប្រភេទ និងជាអ្នកបើកបនល្បែងខ្លួនឯងថែមទៀត

ចែករំលែក៖

ខេត្តបាត់ដំបង៖ បច្ចុប្បន្ននេះ យើងសង្កេតឃើញថាប្រមុខរាជរដ្ឋាភិបាលកម្ពុជា បានយកចិត្តទុកដាក់ចំពោះការបង្រ្កាបល្បែងស៊ីសងខុសច្បាប់គ្រប់ប្រភេទ ដែលកំពុងជ្រកក្រោមរូបភាពស្លាកយីហោផ្សេងៗ ដេីម្បីបន្លំភ្នែកអាជ្ញាធរមានសមត្ថកិច្ចគ្រប់ជាន់ថ្នាក់។

យោងតាមសេចក្តីរាយការណ៍របស់ប្រជាពលរដ្ឋរស់នៅតាមបណ្ដាស្រុក-ក្រុង នៃខេត្តបាត់ដំបង បានបង្ហេីបប្រាប់នៅថ្ងៃទី១០ ខែមីនា ឆ្នាំ២០២៥នេះថា៖ កាលពីពេលថ្មីៗនេះ មានបុគ្គលឈ្មោះ សែម សុខុម ជាមន្រ្តីនគរបាលម្នាក់ មានឋានន្តរសក្ដិ ជាអនុសេនីយ៍ឯក បានអះអាងខ្លួនថា គឺជាជំនួយការលោកឧត្តមសេនីយ៍ទោ ដាញ់ អេងប៊ុនចាន់ ស្នងការនៃស្នងការដ្ឋាននគរបាលខេត្តបាត់ដំបង បានដេីរប្រកាសប្រាប់គេឯងទូទាំងខេត្តបាត់ដំបង ថាខ្លួនអាចឱ្យក្រុមឈ្មួញជាអ្នកបេីកទីតាំងបនល្បែងខុសច្បាប់គ្រប់ប្រភេទ នៅក្នុងមូលដ្ឋានខេត្ត ។

ប្រភពដដែល បានលួចបង្ហេីបប្រាប់បន្ថែមថា បុគ្គលឈ្មោះ សែម សុខុម នោះបានអះអាងថា “ប្រសិនបេីបងប្អូនណា (ក្រុមឈ្មួញបនល្បែងស៊ីសងខុសច្បាប់) ចង់រកស៉ីបេីកទីតាំងបនល្បែងប្រភេទអ្វីក៏បានដែរ ជាពិសេសគឺទីតាំងបនល្បែងសង្វៀនបញ្ជល់មាន់ខុសច្បាប់ ឱ្យរត់ការតាមរយៈខ្លួន គឺមិនមានសមត្ថកិច្ចណាហ៊ានចុះស្រាវជ្រាវបង្ក្រាបនោះទេ ព្រោះតែខ្លួនគឺជាជំនួយការលោកឧត្តមសេនីយ៍ទោ ដាញ់ អេងប៊ុនចាន់ ស្នងការនគរបាលខេត្តបាត់ដំបង គឺគ្រាប់តែបង់ប្រាក់ឱ្យខ្លួនជាប្រចាំខែទៅបានហើយ ព្រោះរូបត្រូវយកប្រាក់នោះទៅឱ្យលោកឧត្តមសេនីយ៍ទោ ស្នងការផ្ទាល់តែម្តង។ ពលរដ្ឋនៅក្រុងបាត់ដំបង បានបន្តថា មិនតែប៉ុណ្ណោះ បុគ្គលឈ្មោះ សែម សុខុម ក៏មានរកស៉ីបេីកទីតាំងបនល្បែងសង្វៀនបញ្ជល់មាន់ខុសច្បាប់ ជារបស់ខ្លួនផ្ទាល់ផងដែរ។

ជុំវិញករណីខាងលេីនេះ លោកឧត្តមសេនីយ៍ទោ ដាញ់ អេងប៊ុនចាន់ ស្នងការ នៃស្នងការដ្ឋាននគរបាលខេត្តបាត់ដំបង បានបញ្ជាក់ប្រាប់អង្គភាពកាសែតនគរវត្ត និងគេហទំព័រនគរដ្រេហ្គន នៅរសៀលថ្ងៃទី១០ ខែមីនា ឆ្នាំ២០២៥នេះ តាមរយៈទូរស័ព្ទដៃថា លោកកំពុងជាប់រវល់ប្រជុំ។

ចំពោះការចោទប្រកាន់របស់ប្រជាពលរដ្ឋមកលើបុគ្គលឈ្មោះ សែម សុខុម ថាបានដេីរយកឈ្មោះ លោកឧត្តមសេនីយ៍ទោ ដាញ់ អេងប៊ុនចាន់ ស្នងការ នៃស្នងការដ្ឋាននគរបាលខេត្តបាត់ដំបង ទៅធ្វេីការកាងល្បែងស៉ីសងខុសច្បាប់នេះដែរ អង្គភាពកាសែតនគរវត្ត និងគេហទំព័រនគរដ្រេហ្គន បានទំនាក់ទំនងតាមរយៈទូរស័ព្ទរបស់សាមីខ្លួនដែរ ប៉ុន្តែតេចូលគ្មានអ្នកលេីកទូរស័ព្ទ។

ដោយឡែកលោក សុខ លូ អភិបាល នៃគណៈអភិបាលខេត្តបាត់ដំបង បានថ្លែងប្រាប់អង្គភាពកាសែតនគរវត្ត និងគេហទំព័រនគរដ្រេហ្គននៅរសៀលថ្ងៃទី១០ ខែមីនា ឆ្នាំ២០២៥នេះថា៖ លោកបានឃើញព័ត៍មាននៅលេីបណ្ដាញសង្គមពាក់ព័ន្ធករណីការចោទប្រកាន់បុគ្គលឈ្មោះ សែម សុខុម ដែរប៉ុន្តែលោកមិនស្គាល់បុគ្គលនោះទេ ។ លោកអភិបាលខេត្ត បន្តថា សួរទៅខាងលោកស្នងការនគរបាលខេត្តបាត់ដំបង ក្រែងស្គាល់ អរគុណចំពោះការសម្ភាសន៍នេះ។

ជុំវិញករណីខាងលេីនេះ អង្គភាពយេីងរង់ចាំការបំភ្លឺ និងបកស្រាយរបស់សាមីខ្លួនផងដែរ។

...

គួររម្លឹកថា កន្លងទៅលោកអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ តែងតែក្រើនរំលឹកដល់ថ្នាក់ដឹកនាំអគ្គស្នងការដ្ឋាននគរបាលជាតិ និងកម្លាំងនគរបាលទាំងអស់ ត្រូវតែបន្ដរួមសហការគ្នា ដើម្បីទប់ស្កាត់ បង្ការ និងបង្ក្រាបបទល្មើសគ្រប់ប្រភេទ ដូចជា ល្បែងស៊ីសងខុសច្បាប់ ការជួញដូរមនុស្សខុសច្បាប់ ជាពិសេសគ្រឿងញៀន សំដៅបន្ដធានាដល់សន្ដិសុខ សណ្ដាប់ធ្នាប់ និងសុវត្ថិភាពសង្គមជូនប្រជាពលរដ្ឋ ក៏ដូចជាភ្ញៀវទេសចរ ក្រោមម្លប់នៃសន្ដិភាព របស់រាជរដ្ឋាភិបាលកម្ពុជា៕ដោយ៖តារា

ចែករំលែក៖