ខេត្តកំពង់ឆ្នាំង៖​ កុដិព្រះសង្ឃមួយខ្នងនៅវត្តវិហារហ្លួង ស្ថិតក្នុងភូមិអណ្តូងច្រុះ ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង ត្រូវអគ្គិភ័យឆេះបំផ្លាញទាំងស្រុង កាលពីវេលាម៉ោង​ ៩យប់ថ្ងៃទី១៤ ខែមីនា ឆ្នាំ២០២៥។

មន្ត្រីអាជ្ញាធរមូលដ្ឋានបានឱ្យដឹងថា កុដិព្រះសង្ឃដែលត្រូវអគ្គិភ័យឆេះបំផ្លាញនេះ មានបណ្តោយប្រវែង​ ១២ ម៉ែត្រ ទទឹង​ ៩ម៉ែត្រធ្វើពីឈើខាងលើ ថ្មក្រោម ប្រក់ស័ង្កសី និងជញ្ជាំងក្តារ។ នៅក្នុងហេតុការណ៍នេះរថយន្តពន្លត់អគ្គិភ័យ ចំនួន​ ៥គ្រឿង ចេញជួយអន្តរាគមន៍ ដោយបានប្រើប្រាស់ទឹកអស់ចំនួន​ ៥រថយន្ត ទើបភ្លើងរលត់ទាំងស្រុង។

មន្ត្រីខាងលើបានឲ្យដឹងថា នៅក្នុងហេតុការណ៍គ្រោះអគ្គិភ័យនេះ បណ្តាលឲ្យឆេះខូចខាតកុដិព្រះសង្ឃមួយខ្នងទាំងស្រុង,ស្រូវ៣០បេ បច្ច័យចំនួន ១.៦០០.០០០ រៀល និងសម្ភារៈប្រើប្រាស់របស់ព្រះសង្ឃមួយចំនួនទៀត ប៉ុន្តែមិនមានគ្រោះថ្នាក់ដល់មនុស្សឡើយ។

សមត្ថកិច្ចបញ្ជាក់ថា មូលហេតុដែលបណ្តាលឱ្យមានអគ្គីភ័យនេះមកពីទុស្សេខ្សែភ្លើង៕

ដោយ៖ សុរិយា