ខេត្តស្វាយរៀង÷ សមត្ថកិច្ចនគរបាលក្រុងស្វាយរៀងបានអោយដឹងនារសៀលថ្ងៃទី១៨ខែមីនាឆ្នាំ២០២៥នេះថា សាលាដំបូងខេត្ត ចេញដីកាឃុំខ្លួនជនដែលត្រូវចោទ ក្នុងពន្ធនាគារខេត្ត រួចហើយពាក់ព័ន្ធករណីឆក់ទូរស័ព្ទ ។

ប្រភពដដែលបន្តថា កាលពីថ្ងៃទី១២ ខែមីនា ឆ្នាំ២០២៥ វេលាម៉ោង ១៧:០២នាទី សមត្ថកិច្ច បានទទួលព័ត៌មានថា នៅត្រង់ចំណុចផ្លូវលេខ១០៨ ស្ថតិក្នុងភូមិមេភ្លើង សង្កាត់ស្វាយរៀង ក្រុងស្វាយរៀង មានករណីឆក់ទូរស័ព្ទ បង្កដោយជនសង្ស័យ ០១នាក់ មិនស្គាល់អត្តសញ្ញាណ ជិះម៉ូតូមួយគ្រឿង ពណ៌ស បានឆក់ទូរស័ព្ទមួយគ្រឿង ម៉ាក iPhone 16 pro max ពណ៌ខ្មៅ ពីជនរងគ្រោះ រួចគេចខ្លួនបាត់។

ក្រោយពីទទួលបានព័ត៌មានករណីខាងលើនេះរួចមក លោកឧត្តមសេនីយ៍ទោ ពេជ្រ វីរ: ស្នងការនគរបាលខេត្ត បានចាត់តាំងលោកវរសេនីយ៍ឯក គឹម ឡៃ ស្នងការរងទទួលផែនការងារព្រហ្មទណ្ឌ ដឹកនាំកម្លាំងការិយាល័យជំនាញ សហការជាមួយកម្លាំងអធិការដ្ឋាននគរបាលក្រុងស្វាយរៀង កម្លាំងអធិការដ្ឋាននគរបាលស្រុកស្វាយជ្រំ និងប៉ុស្តិ៍នគរបាលរដ្ឋបាលស្វាយរៀង ធ្វើការស្រាវជ្រាវតាមរយ:កាមេរ៉ាសុវត្ថិភាពឃើញថា ជនសង្ស័យខាងលើ ធ្លាប់ធ្វើសកម្មភាពប្រព្រឹត្តបទល្មើស ០២ករណី ក្នុងមូលដ្ឋានក្រុងស្វាយរៀង។ លុះដល់ថ្ងៃទី១៥ ខែមីនា ឆ្នាំ២០២៥ សមត្ថកិច្ចយើងឃាត់ខ្លួនជនសង្ស័យ ០១នាក់ ប្រុស ព្រមទាំងដកហូតវត្ថុតាង÷ ម៉ូតូ ០១គ្រឿង និងទូរស័ព្ទ ០១គ្រឿង ម៉ាក iPhone 16 pro mix(របស់ជនរងគ្រោះ)។

នៅចំពោះមុខសមត្ថកិច្ច ជនសង្ស័យ បានឆ្លើយសារភាពថា ខ្លួនពិតជាបានធ្វើសកម្មភាពទាំង ០២ករណីនៅក្នុងមូលដ្ឋានក្រុងស្វាយរៀងពិតប្រាកដមែន។