ភ្នំពេញ៖ ម៉ូតូហុងដាឌ្រីមជិះឆ្លងផ្លូវមិនប្រយ័ត្នត្រូវម៉ូតូនិចបុកបណ្ដាលឱ្យរបួសធ្ងន់ស្រាល៣នាក់កាលពីវេលាម៉ោង៨យប់ថ្ងៃទី១៨ ខែមីនា ឆ្នាំ២០២៥ជិតមហោស្រពកោះពេជ្រ ផ្លូវកោះពេជ្រ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមប្រភពព័ត៌មានពីកន្លែងកើតហេតុ បានអោយដឹងថា មុនពេលកេីតហេតុគេឃើញបុរសម្នាក់បានជិះម៉ូតូម៉ាកហុងដាឌ្រីម ពណ៌ស ពាក់ស្លាកលេខ ភ្នំពេញ 1KK-7954 ឆ្លងចេញពីការដ្ឋានមួយកន្លែង បំណងទៅរកស្តាំរបស់ខ្លួន ពេលម៉ូតូឆ្លងបានពាក់កណ្ដាលផ្លូវក៏ស្រាប់តែមានក្មេងជំទង់ប្រុសស្រី២នាក់ជាសង្សារនឹងគ្នា បានជិះម៉ូតូម៉ាកស៊ុយហ្ស៊ុយគីនិច ពណ៌សលាយលឿង អត់មានស្លាកលេខ បានជិះបោះពួយតាមបណ្ដោយផ្លូវកោះពេជ្រក្នុងទិសដៅពីត្បូងទៅជើងដោយល្បឿនយ៉ាងលឿនក៏ជ្រុលទៅបុកម៉ូតូហុងដាឌ្រីមដែលជិះឆ្លងផ្លូវយ៉ាងពេញទំហឹងបណ្ដាលឱ្យរងការខូចខាតម៉ូតូទាំងសងខាងយ៉ាងដំណំ ព្រមទាំងធ្វើឱ្យបុរសជាអ្នកជិះម៉ូតូហុងដាឌ្រីមរងរបួសបែកក្បាលនិងផ្ទៃមុខ ត្រូវបានដឹកយកទៅសង្គ្រោះនៅមន្ទីរពេទ្យភ្លាមៗ ។
ដោយឡែកខាងម៉ូតូនិចវិញ អ្នកបេីករបួសត្រង់ក្បាលក៏បញ្ជូនទៅសង្គ្រោះនៅមន្ទីរពេទ្យដែរ ចំណែកនារីជាសង្សាររបួសពកក្បាលខាងមុខតិចតួចមិនទៅមន្ទីរពេទ្យនោះទេ ។
ក្រោយកេីតហេតុនៅសល់ម៉ូតូត្រូវបានសមត្ថកិច្ចធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌចំការមនរង់ចាំដំណោះស្រាយ ៕
ដោយ៖សុខាសែនជ័យ
