ភ្នំពេញ៖ លោក ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានថ្លែងថា ខ្ញុំពិតជាមានក្តីរន្ធត់ និងសោកស្តាយជាពន់ពេក ដោយបានទទួលដំណឹងថា ឯកឧត្តម ស្វាយ ដូត ជាមន្រ្តីបម្រើការនៅទីស្តីការគណៈរដ្ឋមន្រ្តី ហើយក៏ជាកីឡាករប្រចាំក្លិបទីស្តីការគណៈរដ្ឋមន្រ្តី បានទទួលមរណភាព ខណៈដែលឯកឧត្តម កំពុងចូលរួមប្រកួតបាល់ទាត់ពានង្វាន់មិត្តភាពយុវជនអន្តរក្រសួង-ស្ថាប័ន កាលពីល្ងាចថ្ងៃទី១៨ ខែមីនា ឆ្នាំ២០២៥ នេះ ដោយជំងឺគាំងបេះដូង។
បើទោះបីជាក្រុមគ្រូពេទ្យបានខិតខំប្រឹងប្រែងយ៉ាងណាក្តី ក៏យើងមិនអាចជួយសង្រ្គោះឯកឧត្តមឱ្យផុតគ្រោះថ្នាក់នេះបាន។ មរណភាពរបស់ឯកឧត្តម ស្វាយ ដូត គឺជាការបាត់បង់ធនធានមន្រ្តីរាជការ និងសហការីដ៏ល្អម្នាក់ ជាការបាត់បង់សមាជិកគ្រួសារជាទីគោរពស្រលាញ់ ហើយក៏ជាការបាត់បង់កីឡាករឆ្នើមមួយរូបរបស់ក្រុម និងក៏ជាសមាជិក ស.ស.យ.ក. ម្នាក់ដែលស្រលាញ់វិស័យកីឡាយ៉ាងជ្រាលជ្រៅផងដែរ។
លោកឧបនាយករដ្ឋមន្ត្រី ស្ថិតក្នុងបរិយាកាសដ៍សែនក្រៀមក្រំនេះ ខ្ញុំសូមចូលរួមរំលែកនូវមរណទុក្ខជាមួយក្រុមគ្រួសារ សហការី និងមិត្តរួមក្រុមទាំងអស់របស់ ឯកឧត្តម ស្វាយ ដូត។ ក្រុមគ្រួសារបាល់ទាត់ ពានង្វាន់មិត្តភាពយុវជនអន្តរក្រសួង-ស្ថាប័នទាំងអស់នឹងចងចាំនូវស្មារតីស្នេហាវិស័យកីឡារបស់ឯកឧត្តមជាប់ជានិច្ចនិរន្តរ៍៕
ដោយ៖តារា
