នាយករដ្ឋមន្ត្រីអ៊ីតាលី Giorgia Meloni បានផ្តល់យោបល់លើសំណើរបស់អង់គ្លេសនិងបារាំងក្នុងការបញ្ជូនកងកម្លាំងរក្សាសន្តិភាពទៅកាន់អ៊ុយក្រែន។ នាយករដ្ឋមន្ត្រី Giorgia Meloni បាននិយាយថា ការបញ្ជូនកងរក្សាសន្តិភាពអឺរ៉ុបទៅកាន់អ៊ុយក្រែននឹង “ប្រថុយប្រថាន ស្មុគស្មាញ និងគ្មានប្រសិទ្ធភាព”។

លោកស្រី Meloni បាននិយាយថា លោកស្រីមិនជឿជាក់ចំពោះសំណើរបស់អង់គ្លេស និងបារាំង ដែលចង់បង្កើត “សម្ព័ន្ធនៃឆន្ទៈ” ដែលគាំទ្រដោយការធានាសន្តិសុខរបស់សហរដ្ឋអាមេរិក ដើម្បីត្រួតពិនិត្យសន្តិភាពនាពេលអនាគតនៅអ៊ុយក្រែន។
ថ្លែងទៅកាន់សភាអ៊ីតាលី ខណៈដែលប្រធានាធិបតីអាមេរិក Donald Trump និងសមភាគីរុស្ស៊ីលោក Vladimir Putin កំពុងនិយាយតាមទូរស័ព្ទអំពីបទឈប់បាញ់ លោកស្រី Meloni បានសម្តែងការគាំទ្រចំពោះកិច្ចខិតខំប្រឹងប្រែងរបស់ទីក្រុងវ៉ាស៊ីនតោន។
ទោះជាយ៉ាងណាក៏ដោយ លោកស្រីបានព្រមានថា ការរក្សាសន្តិសុខរយៈពេលវែងនៅអឺរ៉ុបដោយគ្មានសហរដ្ឋអាមេរិកគឺ “មិនប្រាកដនិយម” ។ លោកស្រីបានប្រាប់សមាជិកសភាអ៊ីតាលីថា “តួនាទីរបស់អ៊ីតាលីមិនមែនគ្រាន់តែធ្វើតាមដៃគូអឺរ៉ុប ឬអាមេរិកប៉ុណ្ណោះទេ ប៉ុន្តែបង្ហាញទស្សនៈផ្ទាល់ខ្លួន និងការមិនពេញចិត្តប្រសិនបើចាំបាច់។
លោកស្រីបានសង្កត់ធ្ងន់ថា “បញ្ហានៃការដាក់ពង្រាយកងទ័ពទៅកាន់អ៊ុយក្រែនមិនដែលមាននៅក្នុងរបៀបវារៈនោះទេ ហើយយើងជឿថាការបញ្ជូនទាហានអឺរ៉ុប ដូចដែលបានស្នើឡើងដោយបារាំង និងចក្រភពអង់គ្លេស គឺជាគំនិតប្រថុយប្រថាន ស្មុគស្មាញ និងគ្មានប្រសិទ្ធភាព”។
កាលពីសប្តាហ៍មុន គណបក្ស Brothers of Italy របស់លោកស្រីបានគាំទ្រផែនការរបស់ EU ក្នុងការជំរុញការចំណាយលើវិស័យការពារជាតិ បន្ទាប់ពីលោក Trump បានបង្កកជំនួយយោធាដល់ទីក្រុង Kiev ហើយបានចាប់ផ្តើមកិច្ចពិភាក្សាជាមួយទីក្រុងម៉ូស្គូ។
លោកស្រីក៏បានព្យាយាមជៀសវាងការប្រឈមមុខជាមួយលោក Trump ដែលបានអញ្ជើញលោកស្រីឱ្យចូលរួមពិធីសម្ពោធរបស់គាត់ ខណៈពេលដែលមិនអញ្ជើញមេដឹកនាំ EU សំខាន់ៗផ្សេងទៀត។
លោកស្រី Meloni ក៏បានច្រានចោលសំណើរបស់ប្រធានាធិបតីបារាំង Emmanuel Macron ក្នុងការពង្រីក “ឆ័ត្រនុយក្លេអ៊ែរ” របស់ទីក្រុងប៉ារីស ទៅកាន់ប្រទេសអឺរ៉ុបផ្សេងទៀត ដោយនិយាយថា នេះបង្កប់ន័យ “ការដកខ្លួនរបស់សហរដ្ឋអាមេរិក”។ លោកស្រីបានសង្កត់ធ្ងន់ថា “ខ្ញុំនឹងជៀសវាងសេណារីយ៉ូនេះ” ៕

រូបថត​: Reuters