ភ្នំពេញ ៖ ក្នុងរបាយការណ៍ជូនសម្តេចធិបតីនាយករដ្ឋមន្ត្រី ក្នុងពិធីបិទសន្និបាត បូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ លោក ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានរៀបរាប់ថា “ការអនុវត្តវិធានការគន្លឹះទាំង៣ នៃកំណែទម្រង់រដ្ឋបាលសាធារណៈ ក្រោមការដឹកនាំរបស់សម្តេចមហាបវរធិបតី ជាពិសេសការវិភាគមុខងារ និងរចនាសម្ព័ន្ធ ផ្តល់ឱកាសឱ្យយើងវាយតម្លៃស្ថានភាពសុខភាព រដ្ឋបាលសាធារណៈជារួម។ ក្នុងនោះការស្វែងយល់ការខ្វះខាត តម្រូវការ សំដៅឈានដល់ការកសាងភាពខ្លាំង ភាពធន់ សក្កានុពល និងថាមពលដើម្បីឆ្ពោះទៅសម្រេចចក្ខុវិស័យឆ្នាំ២០៣០ និងឆ្នាំ២០៥០។”
លោកឧបនាយករដ្ឋមន្ត្រីបានរាយការណ៍សមិទ្ធផលជាច្រើនជុំវិញការអនុវត្តការងារប្រចាំថ្ងៃផង និងលទ្ធផលនៃការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈផង។ “ជាក់ស្តែងការអនុវត្តវិធានការគន្លឺះទី១ ក្នុងការកែលម្អប្រព័ន្ធជ្រើសរើសមន្ត្រីរាជការស៊ីវិល នៃការកែទម្រង់រដ្ឋបាលសាធារណៈ ក្រសួងមុខងារសាធារណៈ បានចូលរួមដោះស្រាយបញ្ហាលើសតែខ្វះមន្ត្រី ក៏ដូចជាផ្លាស់ប្តូរទស្សនៈ មានខ្សែមានលុយ ស្របតាមអភិក្រមរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា «ជាប់ដោយមោទនៈ ធ្លាក់ដោយអស់ចិត្ត» ដែលជាកត្តាផ្តល់ក្តីសង្ឃឹម ភាពជឿជាក់ដល់យុវជនវ័យក្មេងរបស់កម្ពុជា។ ក្រសួងមុខងារសាធារណៈ កំពុងធ្វើបច្ចុប្បន្នភាពមន្ត្រីរាជការ តាមក្រសួង ស្ថាប័ន ជាពិសេសវិស័យអប់រំ និងវិស័យសុខាភិបាលនៅមូលដ្ឋាន ដើម្បីទទួលទិន្នន័យសុក្រឹត ដែលជាមូលដ្ឋានមិនអាចខ្វះបាន ក្នុងការវាយតម្លៃស្ថានភាពខ្វះ និងលើសមន្ត្រី ជាមូលដ្ឋានក្នុងការរៀបចំការជ្រើសរើស និងពង្រាយមន្ត្រី ឈានទៅសម្រេចឱ្យបាននូវអភិក្រមរបស់សម្តេចមហាបវរធិបតី គឺ «រើសឱ្យចំ បំពេញឱ្យត្រូវ និងរក្សាឱ្យនៅ»។” លោលឧបនាយករដ្ឋមន្ត្រី រៀបរាប់ជារបាយការណ៍។
លោកឧបនាយករដ្ឋមន្ត្រី បានបន្ថែមលើការអនុវត្តវិធានការគន្លឹះទី២ ថា “ក្នុងបរិបទនៃស្ថានភាពនយោបាយសកល ការវិភាគមុខងារជាមាគ៌ាមួយដល់ប្រព័ន្ធរដ្ឋបាលសាធារណៈកម្ពុជា អាចពង្រឹងខ្លួន ប្រឈមនូវវិបត្តិនានា តាមរយៈការពង្រឹងនូវសមត្ថភាពស្ថាប័ន ប្រសិទ្ធភាពការងារ សន្សំសំចៃ និងបង្កើនសមត្ថភាពប្រកួតប្រជែងក្នុងការការពារ និងទាញយកផលប្រយោជន៍បន្ថែមដល់កម្ពុជា។
“ប្រាកដណាស់ ការដ្ឋានកែទម្រង់មុខងារសាធារណៈ ដែលក្រសួងមុខងារសាធារណៈ បានកំពុងសម្របសម្រួល សហការរៀបចំជាមួយក្រសួង ស្ថាប័ន ទាមទារឱ្យយើងទាំងអស់គ្នា ធ្វើដំណើររួមគ្នាជាជំហានៗ គិតគូរហ្មត់ចត់ ថ្លឹងថ្លែងច្បាស់លាស់ ដោយឈរលើគោលការណ៍ «ពង្រឹងជាជាងពង្រីក» និងបង្កើនភាពប្រទាក់ក្រឡា បំពេញ និងជំរុញគ្នាទៅវិញទៅមក ក្នុងស្មារតី «ជវភាពនៃប្រព័ន្ធតួអង្គតែមួយ» សំដៅអនុវត្តកម្មវិធីនយោបាយរបស់រាជរដ្ឋាភិបាល ដើម្បីរួមគ្នាឆ្ពោះទៅសម្រេចចក្ខុវិស័យវែងឆ្ងាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការកសាងប្រព័ន្ធរដ្ឋបាលសាធារណៈមួយដែលមានសមត្ថភាពខ្ពស់ ខ្លាំង វៃឆ្លាត និងស្អាតស្អំ។” ឯកឧត្តមឧបនាយករដ្ឋមន្ត្រី បានបន្ថែម។
សមិទ្ធផលដូចដែលបានរំលេចខាងលើ ពិតជាមិនអាចកាត់ផ្តាច់បានពីកិច្ចខិតខំប្រឹងប្រែងក្នុងការអនុវត្តតួនាទី ភារកិច្ចរបស់ថ្នាក់ដឹកនាំ មន្ត្រីរាជការគ្រប់ លំដាប់ថ្នាក់របស់ក្រសួងមុខងារសាធារណៈ ទាំងក្នុងអាណត្តិទី៧ នេះ និងក្នុងអាណត្តិមុនៗ។ ឆ្លៀតក្នុងឱកាសនេះ លោកឧបនាយរដ្ឋមន្ត្រី សូមថ្លែងអំណរគុណយ៉ាងជ្រាលជ្រៅចំពោះ លោក លោកស្រី ជាថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់របស់ ក្រសួង ដែលបានខិតខំបំពេញការងារតាមតួនាទី ភារកិច្ចយ៉ាងសកម្ម ប្រកបដោយស្មារតីទទួលខុសត្រូវ និងការប្តេជ្ញាចិត្តដ៏មោះមុតក្នុងការសម្រេចបាននូវសមិទ្ធផលជាច្រើន ក្នុងវិស័យមុខងារសាធារណៈជូនរាជរដ្ឋាភិបាល។ ជាមួយគ្នានេះ លោកឧបនាយរដ្ឋមន្ត្រី ក៏បានថ្លែងអំណរគុណចំពោះក្រសួង ស្ថាប័ន រដ្ឋបាលរាជធានី ខេត្ត ក្រុង ស្រុក ខណ្ឌ ដែល បានផ្តល់កិច្ចសហការកន្លងមក ក្នុងការអភិវឌ្ឍវិស័យមុខងារសាធារណៈ និងចូលរួម គាំទ្រ និងអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈរបស់រាជរដ្ឋាភិបាល នីតិកាលទី៧ នៃរដ្ឋសភា៕
ដោយ ៖ សិលា
