ភ្នំពេញ៖ ជនសង្ស័យម្នាក់ត្រូវប្រជាពលរដ្ឋចាប់ប្រគល់ឲ្យសមត្ថកិច្ចប៉ុស្តិ៍ភ្នំពេញថ្មី ខណៈកំពុងធ្វើសកម្មភាពគាស់សោបន្ទប់ជួលកម្មការិនីរោងចក្រ កាលពីវេលាម៉ាង៨ និង២០នាទីព្រឹកថ្ងៃទី ២២ ខែសីហា ឆ្នាំ២០១៦ នៅចំណុចបន្ទប់ជួល៣៣ ផ្លូវ២០០០ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។

ជនសង្ស័យមានឈ្មោះ ឌី យ៉ុង ភេទប្រុស អាយុ២៣ឆ្នាំ មុខរបរកម្មកសំណង់ ស្នាក់នៅភូមិច្រេស សង្កាត់ភ្នំពេញថ្មី ខណ្ឌសែនសុខ ។ ចំណែកជនរងគ្រោះ មានឈ្មោះ វុធ ធា ភេទស្រី អាយុ២០ឆ្នាំ មុខរបរកម្មការិនីរោងចក្រ ស្នាក់នៅបន្ទប់ជួលកន្លែងកើតហេតុខាងលើ និងមានស្រុកកំណើត ភូមិក្រោលគោ ឃុំក្រោលគោ ស្រុកស្វាយជ្រុំ ខេត្តស្វាយរៀង។

ប្រភពព័ត៌មានពីកន្លែងកើហេតុបានឲ្យដឹងថា មុនពេលកើតហេតុគេឃើញជនសង្ស័យខាងលើជិះម៉ូតូ១គ្រឿងម៉ាកសង់បុិច ពណ៌ខ្មៅ ពាក់ស្លាកលេខភ្នំពេញ 1CN-8293 លុះមកដល់ចំណុចកើតហេតុរូបគេក៏បានឈប់ហើយដើរចូលទៅកន្លែងបន្ទប់ជួលហើយធ្វើសកម្មភាពយកដែកកែច្នៃចុងស្រួចឆ្កិះសោបន្ទប់ជួលខាងលើយកបានទូរស័ព្ទចំនួន២គ្រឿងដាក់ក្នុងសាក់កាដូហើយក៏មានប្រជាពលរដ្ឋនៅជិតនោះឃើញនាំគ្នាចាប់ប្រគល់ឲ្យសមត្ថកិច្ចប៉ុស្តិ៍ភ្នំពេញថ្មីតែម្តង។

បច្ចុប្បន្នជនសង្ស័យកំពុងធ្វើការសាកសួរនៅប៉ុស្តិ៍នគរបាលរដ្ឋបាលភ្នំពេញថ្មី និងចាប់បញ្ជួនខ្លួនទៅអធិការដ្ឋានខណ្ឌសែនសុខចាត់ការបន្ត៕

ដោយ៖ តុង សីហា