អ៊ីរ៉ង់​បាន​ក្លាយទៅជាក្រុមនៅទ្វីបអាស៉ីមួយទៀតមានកៅអីទៅ​លេង World Cup 2026 បន្ទាប់ពី Mehdi Taremi រកបាន​ពីរគ្រាប់​ក្នុង​លទ្ធផល​ស្មើ 2-2 ជាមួយ Uzbekistan កាលពីថ្ងៃអង្គារ។ 

ខ្សែប្រយុទ្ធ Inter Milan នេះបានស៊ុតបញ្ចូលទីពីរគ្រាប់ នៅនាទីទី52និង 83 ក្នុងទីក្រុង Tehran ដែលជួយឱ្យអ៊ីរ៉ង់បានមួយពិន្ទុបន្ថែម ដែលពួកគេត្រូវការដើម្បីមានសិទ្ធិក្នុងការបង្ហាញខ្លួនជាលើកទី 4 ដងជាប់ៗគ្នានៅ World Cup។

គ្រូបង្វឹកអ៊ីរ៉ង់ លោក Amir Ghalenoei បានសរសើរពីឥទ្ធិពលរបស់ Mehdi Taremi បន្ទាប់ពីខ្សែប្រយុទ្ធ Inter Milan នេះ ស៊ុតបញ្ចូលទីថា “គាត់ជាអ្នកលេងដ៏អស្ចារ្យម្នាក់ទាំងបច្ចេកទេស និងរាងកាយសម្បទា។ ខ្ញុំសប្បាយចិត្តដែលនៅក្នុងការប្រកួតភាគច្រើន គាត់លេងល្អបំផុតនៅលើទីលានឱ្យក្រុមជម្រើសជាតិអ៊ីរ៉ង់។”

កីឡាករវ័យ 32 ឆ្នាំTaremi រកបានបាល់54 គ្រាប់ ក្នុង ចំណោម92 ប្រកួតឱ្យអ៊ីរ៉ង់ ប៉ុន្តែគាត់បានលេងតែ14 ដងប៉ុណ្ណោះចាប់តាំងពីគាត់បានផ្ទេរទៅអ៊ីតាលីចូលរួមក្រុម Inter Milan ។ គាត់ធ្លាប់ជាអ្នកស៊ុតបញ្ចូលទីដ៏ច្រើននៅក្នុងប្រទេសព័រទុយហ្គាល់សម្រាប់ក្រុម Rio Ave និង Portoអស់រយះពេល៥រដូវកាល។