ខេត្តបាត់ដំបង៖ នារសៀលថ្ងៃទី៣១ ខែមីនា ឆ្នាំ២០២៥ បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានដឹកនាំកិច្ចប្រជុំការត្រៀមអនុវត្តកម្មវិធីអន្តរជាតិស្ដីពីរង្វាយតម្លៃការសិក្សារបស់សិស្សឆ្នាំ២០២៥(PISA-2025) ដោយ មានការចូលរួមពី ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា ឯកឧត្តមអភិបាលរងនៃគណៈអភិបាលខេត្តបាត់ដំបង ប្រធានមន្ទីរអប់រំ យុវជន និងកីឡាខេត្តបាត់ដំបង លោក លោកស្រីអភិបាលនៃគណៈអភិបាលក្រុង ស្រុក នាយកសាលាគោលដៅ និងគណៈកម្មការគ្រប់គ្រងសាលាគោលដៅនៃតេស្ត (PISA-2025) និងបុគ្គលិកអប់រំពាក់ព័ន្ធក្រោមឱវាទ។
តេស្ត PISA គឺជាកម្មវិធីវាយតម្លៃអន្តរជាតិដែលរៀប ចំឡើងដោយអង្គការសហប្រតិបត្តិការ និងការអភិវឌ្ឍន៍សេដ្ឋកិច្ច (OECD)។ កម្មវិធីនេះត្រូវបានរៀបចំឡើងជារៀងរាល់៣ឆ្នាំម្តង ដើម្បីវាយតម្លៃចំណេះដឹង និងជំនាញរបស់សិស្សអាយុ១៥ឆ្នាំ ក្នុងមុខវិជ្ជាគណិតវិទ្យា អំណាន និងវិទ្យាសាស្ត្រ។ គោលបំណងចម្បងរបស់ PISA គឺដើម្បីវាយតម្លៃ និងកែលម្អប្រព័ន្ធអប់រំទូទាំងពិភពលោក ដោយផ្តោតលើការធានាថា សិស្សទាំងអស់មានសមត្ថ ភាពគ្រប់គ្រាន់ក្នុងការចូលរួមយ៉ាងមានប្រសិទ្ធភាពក្នុងសង្គម និងសេដ្ឋកិច្ច។
បន្ទាប់ពីបានស្តាប់របាយការណ៍របស់លោកប្រធានមន្ទីរអប់រំ យុវជន និងកីឡាខេត្តបាត់ដំបងលើការត្រៀមអនុវត្តកម្មវិធីអន្តរជាតិស្ដីពីរង្វាយតម្លៃការសិក្សារបស់សិស្សឆ្នាំ២០២៥(PISA-2025)រួចមក បណ្ឌិតសភាចារ្យ ឧបនាយករដ្ឋមន្ត្រី បានណែនាំដល់ក្រុមការងារពាក់ព័ន្ធឱ្យ បង្កើតគណៈកម្មការចុះជួយដល់សាលារៀនគោលដៅ, រៀបចំផែនការចុះជួយដល់សាលារៀនគោល ដៅ ក្នុងគោលបំណងបំប៉នគ្រូបង្គោលនៅតាមសាលា រៀនគោលដៅ និងបំប៉នសិស្សានុសិស្សដែលមានអាយុ ១៥ ឆ្នាំឱ្យមានបំណិនក្នុងការរកចម្លើយ ឬឆ្លើយសំណួរតេស្តឱ្យបានលឿននិងត្រឹមត្រូវ, ធ្វើតេស្តសាកល្បងដល់សិស្សទាំង ៣៥នាក់ នៅតាមសាលារៀនគោលដៅឱ្យបាន ២ដង ទៅ ៣ដង ហើយក្រោយពីធ្វើតេស្តរួចមក ត្រូវណែនាំលោកគ្រូ អ្នកគ្រូដែលជាគ្រូបង្គោលឱ្យជួយពង្រឹងបន្ថែមលើចំណុចខ្វះខាតផ្សេងៗ និងធ្វើតេស្តសាកល្បងម្តងទៀត។ ជាមួយនេះដែរ បណ្ឌិតសភាចារ្យ ឧបនាយករដ្ឋមន្ត្រី បានលើកទឹកចិត្តដល់ក្រុមការងារឱ្យខិតខំប្រឹងប្រែងលើចក្ខុវិស័យនេះ ដើម្បីឱ្យពិន្ទុមធ្យម ភាគនៃការប្រឡងតេស្ត(PISA)ឆ្នាំ២០២៥នេះ លើសពីមធ្យមភាគពីឆ្នាំកន្លងទៅ ដើម្បីសបញ្ជាក់ពីការវិវឌ្ឍនៃគុណភាពអប់រំនៅកម្ពុជា។
ការអនុវត្តកម្មវិធី PISA ឱ្យមានប្រសិទ្ធភាពគឺទាមទារការពង្រឹងប្រព័ន្ធអប់រំទាំងមូលរួមមាន ការអនុវត្តកំណែ ទម្រង់សាលារៀន ការអភិវឌ្ឍគ្រូបង្រៀន ការពិនិត្យសៀវភៅសិក្សាគោលឡើងវិញ និងការកែលម្អវិធីសាស្ត្របង្រៀន ការលើកកម្ពស់ការអប់រំតាមប្រព័ន្ធឌីជីថល ការអភិវឌ្ឍកម្មវិធីសិក្សា ការលើកកម្ពស់សុខភាព ការគាំទ្រ និងបំប៉នសិស្ស ជាពិសេសការថែទាំនិងការអប់រំកុមារតូច។
គួរបញ្ជាក់ដែរថា ក្រសួងបានជ្រើសរើសយកសូចនាករ លទ្ធផលនៃកម្មវិធីអន្តរជាតិស្តីពី រង្វាយតម្លៃលទ្ធផលសិក្សារបស់សិស្ស(PISA)ផ្តោតលើពិន្ទុជាមធ្យម នៃមុខ វិជ្ជាអំណាន គណិតវិទ្យា និងវិទ្យាសាស្រ្ត ជាសូចនាករសមិទ្ធកម្មគន្លឹះ ជាមួយនឹងសូចនាករសមិទ្ធកម្មគន្លឹះចំនួនពីរទៀត រួមមានអត្រារួមនៃការសិក្សានៅមធ្យម សិក្សាបឋមភូមិ និងមធ្យមសិក្សាទុតិយភូមិ និងអត្រាបោះបង់ការសិក្សានៅមធ្យមសិក្សាបឋមភូមិ និងមធ្យម សិក្សាទុតិយភូមិ ដើម្បីវាស់វែងសមិទ្ធកម្ម និងគុណភាពអប់រំនៅក្នុងការ អនុវត្តយុទ្ធសាស្ត្របញ្ចកោណ ដំណាក់ កាលទី១។ បន្ថែមលើនេះ សម្រាប់សាលារៀន និងខេត្តណាដែលទទួលបានលទ្ធផលល្អលើតេស្ត(PISA) ក្រសួងអប់រំ នឹងជួយគាំទ្រក្នុងការប្រែក្លាយសាលារៀននោះឱ្យទៅជាសាលារៀនគំរូ និងប្រែក្លាយប្រធានមន្ទីរឱ្យក្លាយជាប្រធានមន្ទីរអប់រំ យុវជន និងកីឡាគំរូផងដែរ៕
