ខេត្តព្រៃវែង៖ លោកឧត្តមសេនីយ៍ទោ ឈឿន ប៊ុនឆន ស្នងការនៃស្នងការដ្ឋាននគរបាលខេត្តព្រៃវែង បានឱ្យដឹងនៅព្រឹកថ្ងៃទី០២ ខែមេសា ឆ្នាំ២០២៥នេះថា៖ ម្សិលអង្គុយហូបកាហ្វេ មានបងប្រុសម្នាក់នៅខាងសារព័ត៌មានបានសួរខ្ញុំរបៀបលេងៗថា៖ បុណ្យចូលឆ្នាំ (សង្ក្រាន្ត) ប៉ុន្មានថ្ងៃខាងមុខនេះ តើប្អូនឆនឯងបារម្ភរឿងសន្តិសុខក្នុងខេត្តព្រៃវៃងឬទេ? ពិសេសរឿងក្មេងៗវ៉ៃកាប់ចាក់គ្នា?
លោកឧត្តមសេនីយ៍ទោ ស្នងការបានឱ្យដឹងទៀតថា លោកញញឹមនិងឆ្លើយត្រឡប់ថា៖ ខ្ញុំមានជំនឿនឹងមិនមានក្មេងៗឬចាស់ៗឈ្លោះកាប់ចាក់គ្នានោះទេ! ទី១ ខ្ញុំយល់ឃើញ បច្ចុប្បន្នស្រទាប់យុវជនក្នុងខេត្តកាន់តែយល់ដឹងពីតម្លៃកិត្តិយសសេចក្តីថ្លៃថ្នូរទាំងផ្ទាល់ខ្លួន និងកិត្តិយសមុខមាត់ខេត្តព្រៃវែងតែម្តង ដូចនេះពួកគាត់នឹងមិនធ្វើអំពើណាមួយឈានទៅលក់មុខមាត់គ្រួសារគាត់ឬមុខមាត់កិត្តិយសខេត្តព្រៃវែងឡើយ ។ ទី២ ស្រទាប់យុវជនក៏មានការខ្លាចខ្នោះឃ្នាង មន្ទីរឃុំឃាំងផងដែរ ។
បន្ថែមពីនេះ លោកស្នងការបានបញ្ជាក់ថា យ៉ាងណាក៏ដោយ វិធានការបង្ការ និងវិធានការត្រៀមបង្ក្រាបយ៉ាងម៉ឺងម៉ាត់ក៏ពួកខ្ញុំបានរៀបចំរួចរាល់ហើយផងដែរ ។ បើក្មេងៗឬចាស់ៗណាមួយមិនស្រលាញ់កិត្តិយសហ៊ានប្រព្រឹត្តបទល្មើស នោះច្បាស់លាស់ណាស់ រត់គេចទៅដល់រន្ធក្តាមក៏ត្រូវជីកយកមកអនុវត្តទោសឱ្យខាងតែបានដែរ។ បើពួកគាត់មិនជឿ សាកល្បងប្រមាថទៅ!
ដោយ៖តារា
