ភ្នំពេញ៖ រដ្ឋបាលរាជធានីភ្នំពេញ កំពុងធ្វើការរៀបចំសង្ក្រាន្តវត្តភ្នំនិងរៀបចំតុបតែងលម្អរសោភ័ណភាពតាមទីកន្លែងសាធារណៈសំខាន់ៗ ក្នុងរាជធានីភ្នំពេញ។
គិតត្រឹមថ្ងៃទី០២ ខែមេសា ឆ្នាំ២០២៥នេះ ក្រោមការណែនាំពី ឯកឧត្ដម ឃួង ស្រេង អភិបាលរាជធានីភ្នំពេញ ក្រុមការងារជំនាញរដ្ឋបាលរាជធានីភ្នំពេញ ,មន្ទីរវប្បធម៌និងវិចិត្រសឹល្បៈរាជធានីភ្នំពេញ ,មន្ទីរសាធារណការនិងដឹកជញ្ជូនរាជធានីភ្នំពេញកំពុងធ្វើការរៀបចំសង្ក្រាន្តវត្តភ្នំនៅរមណីយដ្ឋានវប្បធម៌ប្រវត្តិសាស្ត្រវត្តភ្នំ និងរៀបចំតុបតែងលម្អរសោភ័ណភាពនៅទីកន្លែងសាធារណៈសំខាន់មួយចំនួនទៀតនៅក្នុងរាជធានីភ្នំពេញ ដើម្បីត្រៀមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ព.ស ២៥៦៨ ខាងមុខ។
ដើម្បីចូលរួមអបអរឆ្នាំថ្មី ឆ្នាំម្សាញ់ ព.ស ២៥៦៨ រដ្ឋបាលរាជធានីភ្នំពេញ នឹងរៀបចំកម្មវិធីដ៏អធឹកអធម សង្ក្រាន្តវត្តភ្នំ ឆ្នាំ២០២៥កម្មវិធីនេះ នឹងប្រារព្ធធ្វើឡើង នៅរមណីយដ្ឋានប្រវត្កិសាស្ត្រវត្តភ្នំ ចំនួន៣ថ្ងៃ ត្រូវនឹងថ្ងៃទី១៤, ១៥ និងថ្ងៃទី១៦ ខែមេសា ឆ្នាំ២០២៥ បន្ថែមពីនេះ សម្រាប់ផ្លូវថ្មើរជើង ឬ Walk Street វិញ ក៏បានរៀបចំ មុនថ្ងៃចូលឆ្នាំ២ថ្ងៃ ហើយថែម៣ថ្ងៃក្នុងថ្ងៃចូលឆ្នាំ ឡើងដល់៥ថ្ងៃ សម្រាប់បម្រើជូនប្រជាពលរដ្ឋ និងទេសចរជាតិ-អន្តរជាតិ កម្សាន្តសប្បាយ។
នេះបើតាមការបញ្ជាក់ពីលោកស្រី ដោ សម្ផស្ស នាយិការងរដ្ឋបាលនិងជាអ្នកនាំពាក្យសាលារាជធានីភ្នំពេញនាថ្ងៃទី២មេសានេះ។
លោកស្រី ដោ សម្ផស្ស បានបន្តថា៖ សង្ក្រាន្តវត្តភ្នំ ឆ្នាំ២០២៥នេះ រដ្ឋបាលរាជធានីភ្នំពេញ នឹងរៀបចំឱ្យមានពិធីសាសនា ដូចជា ការទទួលទេវត្តាឆ្នាំថ្មី ដង្ហែព្រះពុទ្ធរូប ពូនភ្នំខ្សាច់ ស្រង់ព្រះជាដើម។ ដោយឡែកសម្រាប់កម្មវិធី កម្សាន្តសប្បាយៗ មានដូចជា ការសម្តែងសិល្បៈរបាំប្រពៃណី មានរបាំទ្រុត ចាប៉ីដងវែង ល្ខោនយីកេ ល្ខោនមហោរី ការលេងល្បែងប្រជាប្រិយជាតិដែលជាកេរ្តិ៍ដំណែរដូនតាខ្មែរ និងមានប្រគំតន្ត្រី បុរាណ-សម័យ ការរាំលេងកម្សាន្ត គ្រប់ទម្រង់ និងគ្រប់ចង្វាក់ភ្លេង និងតាំងពិពណ៌ផលិតផលខ្មែរ នៅរមណីយដ្ឋានប្រវត្តិសាស្ត្រវត្តភ្នំ្ននេះតែម្តង។ជាមួយគ្នានេះ រដ្ឋបាលរាជធា នីក៏បានលើកទឹកចិត្ត ឱ្យពលរដ្ឋដែលចូលរួម ស្លៀកសម្លៀកបំពាក់ប្រពៃណី ក្នុងកម្មវិធីប្រពៃណីខ្មែរ ដើម្បីលើកស្ទួយដល់វប្បធម៌ជាតិផងដែរ ។បន្ថែមពីនេះ រដ្ឋបាលរាជធានីភ្នំពេញនឹងភ្ជាប់ផ្លូវថ្មើរជើង Walk Street ជាមួយការរៀបចំសង្ក្រាន្តវត្តភ្នំផងដែរ ពោលគឺផ្លូវថ្មើរជើងនឹងបើកបន្តដល់៥ថ្ងៃ ដោយបន្ថែម៣ថ្ងៃ នៃថ្ងៃបុណ្យចូលឆ្នាំខ្មែរ រហូតដល់បញ្ចប់បុណ្យចូលឆ្នាំថ្មី ។
លោកស្រីបន្តទៀតថា៖ ឆ្នាំនេះ ទីតាំងកម្សាន្តរបស់យើង គឺមានបរិវេណធំជាង ឆ្នាំកន្លងទៅ ហើយអ្វីដែលចាប់អារម្មណ៍ នៅផ្លូវថ្មើជើងWalk Street គឺយើងធ្វើនៅថ្ងៃសៅរ៍ និងថ្ងៃអាទិត្យ ចំថ្ងៃទី១២ និងទី១៣ខែមេសា សម្រាប់ថ្ងៃចូលឆ្នាំគឺចាប់ពីថ្ងៃទី១៤-១៥-១៦ ដូច្នេះរដ្ឋបាលរាជធានីភ្នំពេញ នឹងរៀបចំឱ្យមានកម្មវិធីនេះ ចាប់ពីថ្ងៃទី១២ រហូតដល់ថ្ងៃទី១៦ ភ្ជាប់គ្នាតែម្តង ។ រមណីយដ្ឋានវត្តភ្នំ យើងនឹងធ្វើសង្ក្រាន្តរយៈពេល៣ថ្ងៃ ១៤ដល់១៦ តាំងពីម៉ោង៨ព្រឹក ដល់ម៉ោង ២០យប់ យើងមានកម្មវិធីបែបប្រពៃណី កម្មវិធីសប្បាយកម្សាន្តជាច្រើន មានការទទួលទេវត្តា ដង្ហែព្រះពុទ្ធរូប ពូនភ្នំខ្សាច់ ស្រង់ព្រះ សម្តែងសិល្បៈរបាំប្រពៃណី លេងល្បែងប្រជាប្រិយជាតិ មានប្រគំតន្ត្រី បុរាណ-សម័យ ការរាំលេងកម្សាន្ត និងតាំងពិពណ៌ផលិតផលខ្មែរ នៅរមណីយដ្ឋានប្រវត្តិសាស្ត្រវត្តភ្នំ ដោយឡែកចំពោះ Walk Street វិញ នៅថ្ងៃចូលឆ្នាំនេះ គឺយើងនឹងបើករយៈពេល៥ថ្ងៃតែម្តង ដោយចាប់តាំងពីថ្ងៃទី១២ ដល់១៦ ចឹងខុសប្លែកពីរាល់សប្តាហ៍ ដែលយើងធ្វើតែ២ថ្ងៃ នៅសប្តាហ៍នៃថ្ងៃចូលឆ្នាំនឹង គឺយើងធ្វើរហូតដល់៥ថ្ងៃ” ។
រដ្ឋបាលរាជធានីភ្នំពេញ ក៏បានអំពាវនាវដល់បងប្អូនប្រជាពលរដ្ឋ គ្រប់មជ្ឈដ្ឋានទាំងអស់ អញ្ជើញមកចូលរួមទស្សនាកម្សាន្តដោយសប្បាយ នៅសង្ក្រាន្តវត្តភ្នំ និងផ្លូវថ្មើរជើង របស់រដ្ឋបាលរាជធានីភ្នំពេញ ឱ្យបានច្រើនកុះករ ក្រោមម្លប់សន្តិភាពដ៏ត្រជាក់ត្រជុំនេះ។
លោកស្រីអ្នកនាំពាក្យបានបន្ថែមថា ក្រៅពីការរៀបចំសង្ក្រាន្តវត្តភ្នំ អាជ្ញាធរមូលដ្ឋានតាមបណ្តាខណ្ឌទាំង១៤ខណ្ឌ ក៏បានត្រៀមរៀបចំធ្វើសង្ក្រាន្តរបស់ខណ្ឌនីមួយៗដែរ។សម្រាប់ការការពារសន្តិសុខសណ្តាប់ និងរបៀបរៀបរយសាធារណៈវិញរដ្ឋបាលរាជធានីភ្នំពេញ នឹងធានាជូនប្រជាពលរដ្ឋ អាចមកលេងកម្សាន្តដោយភាពរីករាយ ដោយមិនក្តីបារម្ភ ដោយសាររដ្ឋបាលរាជធានីភ្នំពេញ មិនបានកាត់បន្ថយកម្លាំង ឬវិធានការណាមួយឡើយ ពោលគឺរដ្ឋបាលរាជធានីភ្នំពេញបានត្រៀមរួចរាល់ ក្នុងការផ្តល់នូវការថែរក្សាសន្តិសុខសណ្តាប់ធ្នាប់ របៀបរៀបរយសាធារណៈជូនប្រជាពលរដ្ឋ ។

សូមបញ្ជាក់ថា ទំនៀមពិធីចូល ឆ្នាំប្រព្រឹត្តទៅចំនួន៣ថ្ងៃ ។ ថ្ងៃដំបូងជាថ្ងៃមហាសង្ក្រាន្ត,ថ្ងៃទី២ជាថ្ងៃវនបត, ថ្ងៃទី៣ជាថ្ងៃឡើងស័ក។ រីឯការកំណត់ខែថ្ងៃម៉ោងនាទី ដែល ឆ្នាំចាស់ត្រូវផុតកំណត់ហើយទេព្តាឆ្នាំថ្មីត្រូវ ចុះ មកទទួលតំណែងពីទេព្តាឆ្នាំចាស់ នោះគេអាចដឹងបានដោយប្រើក្បួនហោរាសាស្ត្របុរាណ គឺក្បួនមហាសសង្ក្រាន្តត។ ពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ព.ស.២៥៦៨នឹងប្រព្រឹត្តទៅនៅថ្ងៃទី១៤-១៥-១៦ ខែមេសា ឆ្នាំ២០២៥សូមបងប្អូនប្រជាពលរដ្ឋ អញ្ជើញមកចូលរួមអោយបានច្រេីនកុះករ៕

ដោយ ៖ សំរិត