ភ្នំពេញ ៖ ប្រធានសម្ព័ន្ធភាពបណ្ដុំសមាគមអង្គការសង្គមស៊ីវិល ព្រមទាំងថ្នាក់ដឹកនាំ សមាជិក សមាជិកា ទាំងអស់ និងតំណាងសមាគមអង្គការទាំង២១ អង្គភាព គាំទ្រយ៉ាងពេញទំហឹង និង ចូលរួមជាមួយយុទ្ធនាការ «និយាយថាទេ ចំពោះព័ត៌មានក្លែងក្លាយ!» “Say No to Fake News” រៀបចំនិងដឹកនាំដោយក្រសួងព័ត៌មាន ។

សេចក្តីប្រកាសគាំទ្រ
តាងនាមខ្ញុំបាទ ហែម ប្រសើរ ប្រធានសម្ព័ន្ធភាពបណ្ដុំសមាគមអង្គការសង្គមស៊ីវិល ព្រមទាំង ថ្នាក់ដឹកនាំ សមាជិក សមាជិកា ទាំងអស់ និងតំណាងសមាគមអង្គការទាំង ២១ អង្គភាព សូមគាំទ្រយ៉ាងពេញទំហឹង និង ចូលរួមជាមួយយុទ្ធនាការ «និយាយថាទេ ចំពោះព័ត៌មានក្លែងក្លាយ!» “Say No to Fake News” របស់ក្រសួងព័ត៌មាន ដឹកនាំដោយ លោក នេត្រ ភក្ត្រា ដែលបានថ្លែងសារនៅក្នុងសន្និសីទសារព័ត៌មាន នាថ្ងៃទី៣១ ខែមីនា ឆ្នាំ២០២៥ នៅមណ្ឌលបណ្តុះបណ្តាល និងវិក្រិតការវិជ្ជាជីវៈសារព័ត៌មាន ទីស្តីការក្រសួងព័ត៌មាន ដើម្បីប្រយុទ្ធប្រឆាំង និងទប់ស្កាត់ ព័ត៌មានក្លែងក្លាយ ពិសេសធ្វើយ៉ាងណារួមគ្នាកម្ចាត់ព័ត៌មានក្លែងក្លាយរបស់ក្រុមជ្រុលនិយមឱ្យអស់ចេញពីកម្ពុជា ដើម្បី រក្សាបាននូវសន្តិភាព និងការអភិវឌ្ឍ។

សម្ព័ន្ធភាពបណ្ដុំសមាគមអង្គការសង្គមស៊ីវិល មានក្តីរំពឹងថាសាធារណជនទូទៅ នឹងចូលរួមផ្សព្វផ្សាយ នូវព័ត៌មានមានផលប្រយោជន៍ដល់សង្គមជាតិ និងចូលរួមទប់ស្កាត់រាល់ព័ត៌មានក្លែងក្លាយ ដោយធ្វើយ៉ាងណារួមគ្នា ទប់ស្កាត់រាល់ព័ត៌មានក្លែងក្លាយ ប្រឌិត ដែលបង្កើតឡើងដោយក្រុមប្រឆាំងជ្រុលនិយម ក្នុងចេតនាញុះញង់ ភាព ទុច្ចរិត ធ្វើឱ្យប្រទេសជាតិបែកបាក់ បង្កើតបដិវត្តពណ៌ និងអស្ថិរភាពនៅក្នុងសង្គមជាដើម។

សម្ព័ន្ធភាពបណ្ដុំសមាគមអង្គការសង្គមស៊ីវិល សូមអំពាវនាវដល់ពលរដ្ឋទាំងអស់ ត្រូវផ្ទៀងផ្ទាត់ ប្រភពព័ត៌មានឱ្យបានច្បាស់លាស់ មុននឹងជឿលើព័ត៌មានអ្វីមួយ។ ម្យ៉ាងទៀត ក៏ត្រូវពិចារណាឱ្យច្បាស់លាស់មុនចែក រំលែកព័ត៌មានលើបណ្តាញសង្គម និងចែករំលែកដល់មិត្តភក្តិ ឬក្រុមគ្រួសារ។ មួយវិញទៀតក៏សូមអំពាវនាវដល់អ្នកសារ ព័ត៌មាន ឱ្យផ្សព្វផ្សាយពិតគ្រប់ជ្រុងជ្រោយ មានប្រភពព័ត៌មានច្បាស់លាស់ ដើម្បីចូលរួមលុបបំបាត់ព័ត៌មានក្លែងក្លាយ៕

ដោយ ៖ សិលា