លោក ដូណាល់ ត្រាំ បានប្រកាសពីការដំឡើងពន្ធថ្មីមួយទៀតកាលពីថ្ងៃពុធ ដោយលើកហេតុផលថាការធ្វើបែបនេះនឹងអនុញ្ញាតឱ្យសហរដ្ឋអាមេរិកទទួលបានជោគជ័យ។
ពន្ធគយរបស់លោក ត្រាំ ដែលលោកដាក់តាមបញ្ជាប្រតិបត្តិ ត្រូវបានគេរំពឹងថានឹងប៉ះពាល់សេដ្ឋកិច្ចជុំវិញពិភពលោក។
មន្ត្រីជាន់ខ្ពស់សេតវិមានបានប្រាប់អ្នកសារព័ត៌មានថា ប្រធានាធិបតីនឹងដាក់ “ពន្ធមូលដ្ឋាន” លើគ្រប់ប្រទេសទាំងអស់ ១០% ហើយនឹងចូលជាធរមាននៅថ្ងៃទី ៥ ខែមេសា។ ប្រទេសមួយចំនួននឹងប្រឈមមុខនឹងអត្រាមូលដ្ឋាន១០%តែប៉ុណ្ណោះ រួមមាន: ចក្រភពអង់គ្លេស សិង្ហបុរី ប្រេស៊ីល អូស្ត្រាលី នូវែលសេឡង់ ទួរគី កូឡុំប៊ី អាហ្សង់ទីន អែលសាល់វ៉ាឌ័រ អេមីរ៉ាតអារ៉ាប់រួម អារ៉ាប៊ីសាអូឌីត។
ចាប់ពីថ្ងៃពុធសប្តាហ៍ក្រោយ (ថ្ងៃទី 9 ខែមេសា) សហរដ្ឋអាមេរិកក៏នឹងដាក់ពន្ធគយខ្ពស់ជាងមុនលើសេដ្ឋកិច្ចជិត 60ប្រទេស ដែលខ្លួនមានឱនភាពពាណិជ្ជកម្មធំបំផុត។ បណ្តាលប្រទេសនៅអាស៊ី រួមមានៈ ឡាវ – ៤៨ ភាគរយ វៀតណាម – ៤៦ ភាគរយ មីយ៉ាន់ម៉ា – ៤៥ ភាគរយ ប្រទេសថៃ – ៣៧ ភាគរយ ប្រទេសចិន – ៥៤ ភាគរយ ឥណ្ឌូនេស៊ី – ៣២ ភាគរយ តៃវ៉ាន់ – ៣២ ភាគរយ ឥណ្ឌា – ២៧ ភាគរយ កូរ៉េខាងត្បូង – ២៦ ភាគរយ ប្រ៊ុយណេ – ២៤ ភាគរយ ជប៉ុន – ២៤ ភាគរយ ម៉ាឡេស៊ី – ២៤ ភាគរយ ហ្វីលីពីន – ១៨ ភាគរយ។
ហេតុអ្វីបានជា លោកត្រាំ ធ្វើបែបនេះ?
លោកត្រាំ
បានកំណត់អាទិភាពកាត់បន្ថយឱនភាពពាណិជ្ជកម្មរបស់សហរដ្ឋអាមេរិក ដែលជាពេលដែលការនាំចូលរបស់ប្រទេសមួយលើសពីការនាំចេញរបស់ពួកគេ ជាដំណោះស្រាយចំពោះបញ្ហាសេដ្ឋកិច្ច។ កាលពីឆ្នាំមុន សហរដ្ឋអាមេរិកបានធ្លាក់ចុះឱនភាពពាណិជ្ជកម្មចំនួន ១,២១ ពាន់ពាន់លានដុល្លារអាមេរិក។ ឱនភាពពាណិជ្ជកម្មប្រចាំឆ្នាំសរុបរបស់ខ្លួនលើទំនិញ និងសេវាកម្មមានចំនួន 918.4 ពាន់លានដុល្លារ។ ឱនភាពពាណិជ្ជកម្មទំនិញធំបំផុតរបស់អាមេរិកគឺជាមួយប្រទេសចិន (២៩៥,៤ ពាន់លានដុល្លារ) សហភាពអឺរ៉ុប (២៣៥,៦ ពាន់លានដុល្លារ) ម៉ិកស៊ិក (១៧១,៨ ពាន់លានដុល្លារ) វៀតណាម (១២៣,៥ ពាន់លានដុល្លារ) និងអៀរឡង់ (៨៦,៧ ពាន់លានដុល្លារ)។
