ភ្នំពេញ÷ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាអនុប្រធានគណបក្ស ប្រជាជន បានទទួលជួបសម្ដែងការគួរសមជាមួយ  ឧត្តមសេនីយ៍ឯក Nguyen Van Nam សមាជិកគណៈកម្មាធិការអចិន្ត្រៃយ៍នៃគណៈកម្មាធិការបក្សទីក្រុងហូជីមិញ អតីតមេបញ្ជាការបញ្ជាការយោធាទីក្រុង និងជាប្រធានសមាគមមិត្តភាពវៀតណាម- កម្ពុជា ទីក្រុងហូជីមិញ ដែលបានរៀបចំនៅវិមាន៧ មករា នាព្រឹកថ្ងៃព្រហស្បត្តិ៍ ៦កើត ខែចេត្រ ឆ្នាំរោង ឆស័ក ព.ស.២៥៦៨ ត្រូវនឹង ថ្ងៃទី៣ ខែមេសា ឆ្នាំ២០២៥។

ថ្លែងក្នុងឱកាសនោះ សម្តេចកិត្តិសង្គហបណ្ឌិត បាននាំ ការផ្តាំផ្ញើ សាកសួរសុខទុក្ខពីសំណាក់ សម្តេចអគ្គមហា សេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ជូនដល់ថ្នាក់ដឹកនាំគ្រប់លំដាប់ថ្នាក់របស់ប្រទេសវៀតណាម ក៏ដូចជាប្រធានប្រតិភូដែលបានដឹកនាំគណៈប្រតិភូមកសម្តែងការគួរសម ក្នុងថ្ងៃនេះ សូមមានសុខភាពល្អ និងទទួលបានជោគជ័យគ្រប់ភារកិច្ច។

សម្តេចកិត្តិសង្គហបណ្ឌិតបានសម្តែងនូវការស្វាគមន៍ និងបានចាត់ទុកដំណើរទស្សនៈកិច្ចរបស់លោកនាពេល នេះ បានបង្ហាញពីការខិតខំបន្តពង្រឹង និងពង្រីកនូវកិច្ចសហប្រតិបត្តិការល្អប្រសើរបន្ថែមទៀត ដើម្បីជម្រុញនូវ ល្បឿននៃការអភិវឌ្ឍន៍ប្រទេជាតិនៃប្រទេសទាំងពីរ ។

ឧត្តមសេនីយ៍ឯក Nguyen Van Nam ក៏បានថ្លែងនូវការកោតសសើរចំពោះការអភិវឌ្ឍន៍យ៉ាងឆាប់រហ័សរបស់កម្ពុជា។ លោកក៏បាន លើកឡើង អំពីសមិទ្ធិផលជាច្រើន ដែលពលរដ្ឋកម្ពុជាទទួលបាន ក្រោមការដឹកនាំរបស់សម្តេចតេជោ ហ៊ុន សែន ប្រធានគណបក្ស ប្រជាជនកម្ពុជា និងក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ទើបកម្ពុជាមានការរីកចម្រើនដូចបច្ចុប្បន្ន៕