ភ្នំពេញ ៖ សម្តេចតេជោ ហ៊ុន សែន ប្រមុខរដ្ឋស្តីទី បានផ្ញើសារលិខិតថ្លែងអំណរព្រះរាជគុណ ថ្លែងអំណរព្រះគុណ និងអរគុណ ព្រះមហាក្សត្រ សម្តេចម៉ែ សម្តេចព្រះសង្ឃរាជ ព្រះសង្ឃ ថ្នាក់ដឹកនាំ មន្រ្តីរាជការ និងជនរួមជាតិទាំងអស់ ដែលបានផ្ញើសារ និងចូលរួមរំលែកទុក្ខចំពោះ មរណភាព ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន រដ្ឋលេខាធិការនៃក្រសួងសាធារណការ និងដឹកជញ្ជូន ដែលជាបងប្រុសរបស់សម្តេច។
ទូលព្រះបង្គំ ខ្ញុំព្រះករុណាខ្ញុំ និងភរិយា ក្នុងនាម ក្រុមគ្រួសារ ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន រដ្ឋលេខាធិការនៃក្រសួងសាធារណការ និងដឹកជញ្ជូន ដែលបានទទួលមរណភាព កាលពីថ្ងៃសុក្រ ១៥រោច ខែផល្គុន ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៨ ខែមីនា ឆ្នាំ២០២៥ ក្នុងជន្មាយុ ៧៨ឆ្នាំ ដោយរោគាពាធ ជាបឋម សូម ព្រះបរមរាជានុញ្ញាត លំឱនកាយវាចាចិត្ត ថ្លែងអំណរព្រះរាជគុណ ព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត និងសូមលំឱន កាយវាចាចិត្ត ថ្លែងអំណរព្រះរាជគុណ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ជាទីសក្ការៈដ៏ខ្ពង់ខ្ពស់បំផុត ដែលព្រះអង្គទាំងទ្វេ ស្ដេចទ្រង់សព្វព្រះរាជហឫទ័យ ប្រោសព្រះរាជទាន នូវព្រះរាជសារលិខិតរំលែកទុក្ខ ចំពោះក្រុមគ្រួសារសព ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន។ ខ្លឹមសារព្រះរាជសារលិខិត ពោរពេញដោយសេចក្តីសង្វេគ ស្តាយស្រណោះអាឡោះអាល័យស្ទើររកទីបំផុតគ្មាន និងសូមឧទ្ទិសដួងវិញ្ញាណក្ខន្ធអញ្ជើញទៅកាន់សុគតិភព។
សូមថ្លែងអំណរព្រះរាជគុណ អំណរព្រះគុណ និងអរគុណយ៉ាងជ្រាលជ្រៅជាអនេកប្បការចំពោះ សម្តេច ព្រះ តេជព្រះគុណ ព្រះសង្ឃគ្រប់ព្រះអង្គ សម្តេច ព្រះអង្គម្ចាស់ អ្នកអង្គម្ចាស់ ទ្រង់ ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី ថ្នាក់ដឹកនាំ និងសមាជិក សមាជិកានៃព្រឹទ្ធសភា រដ្ឋសភា និងរាជរដ្ឋាភិបាល និង មន្ត្រីរាជការមកពីគ្រប់ក្រសួង-ស្ថាប័នសាធារណៈ អាជ្ញាធរគ្រប់លំដាប់ថ្នាក់ វិស័ វិស័យឯកជន អង្គការ សមាគមសង្គមស៊ីវិល និងបណ្តាអ្នកសារព័ត៌មាន ព្រមទាំង សីលវន្ត សីលវតី ឧបាសក ឧបាសិកា ពុទ្ធបរិស័ទ គ្រិស្តបរិស័ទ ឥស្លាមបរិស័ទ បងប្អូន ញាតិមិត្តជិតឆ្ងាយ ភ្ញៀវជាតិ អន្តរជាតិទាំងអស់ ដែលបានឆ្លៀតឱកាសដ៏មានតម្លៃ និងដ៏មមាញឹក យាង និមន្ត នឹង អញ្ជើញចូលរួម តាមរយៈសារលិខិតរំលែកទុក្ខក្តី និងកាចូលរួមឧទ្ទិសមគ្គផលកុសល អានិសង្ស គោរពវិញ្ញាណក្ខន្ធ ដោយផ្ទាល់ក្តី និងបានយោគយល់អធ្យាស្រ័យ សហការជួយជ្រោមជ្រែងលើកកម្ពស់កម្មវិធីបុណ្យទក្ខិណានុប្បទាន ប្រព្រឹត្តទៅយ៉ាងរលូន និងអធិកអធម តាមប្រពៃណីជាតិ ព្រះពុទ្ធសាសនា និងបានបួងសួងដល់ដួងវិញ្ញាណក្ខន្ធសព ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន អញ្ជើញទៅកាន់សុគតិភព។
ជាថ្មីម្តងទៀត ក្នុងនាម ក្រុមគ្រួសារ ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន ទូលព្រះបង្គំ ខ្ញុំព្រះករុណា ខ្ញុំ និងភរិយា សូមថ្វាយ ប្រគេន និងជូននូវសព្ទសាធុការពរ បវរមហាប្រសើរ ចំពោះ សម្តេច ព្រះតេជព្រះគុណ ព្រះសង្ឃ គ្រប់ព្រះអង្គ សម្តេច ព្រះអង្គម្ចាស់ អ្នកអង្គម្ចាស់ ទ្រង់ ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី សីលវន្ត សីលវតី ឧបាសក ឧបាសិកា ពុទ្ធបរិស័ទ គ្រិស្តបរិស័ទ ឥស្លាមបរិស័ទ បងប្អូនញាតិមិត្តជិតឆ្ងាយ ភ្ញៀវ ជាតិ អន្តរជាតិទាំងអស់ បានសមប្រកបដោយពុទ្ធពរ និងពរទាំងប្រាំប្រការគឺ អាយុ វណ្ណៈ សុខៈ ពលៈ និង បដិភាណ កុំបីឃ្លៀងឃ្លាតឡើយ និង សូមទទួលនូវការគោរពរាប់អានដ៏ជ្រាលជ្រៅពីទូលព្រះបង្គំ ខ្ញុំព្រះករុណាខ្ញុំ និងភរិយា ព្រមទាំងក្រុមគ្រួសារ៕
ដោយ ៖ សិលា
