ភ្នំពេញ ៖ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ចេញព្រះរាជក្រឹត្យត្រាស់បង្គាប់ តែងតាំងមុខតំណែង ជាអនុរដ្ឋលេខាធិការ នៃក្រសួងធម្មការនិងសាសនា ២រូប ក្នុងនោះ ៖
១-លោក ជួន កក្កដា
២-លោក សួន សុធារ៉ា
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ត្រូវទទួលបន្ទុកអនុវត្តព្រះរាជក្រឹត្យនេះ ចាប់ពីថ្ងៃឡាយព្រះហស្ថលេខាតទៅ។
សូមបញ្ជាក់ថា ៖ អន្ទិត ជួន កក្កដា ដែលទើបលាចាកសិក្ខាបទ នៅយប់ថ្ងៃទី២២ ខែមីនា ឆ្នាំ២០២៥នេះ បានចេញវីដេអូបកស្រាយបំភ្លឺចំពោះមូលហេតុដែលលោកបានលាចាកសិក្ខាបទ ដោយអះអាងបញ្ជាក់ថា ការសឹករបស់លោក មិនមានការបង្ខិតបង្ខំនោះទេ។
ការចេញមកបំភ្លឺតាមរយៈវីដេអូនេះ បានធ្វើឡើងបន្ទាប់ពីមានការលើកឡើងថា រូបលោកសឹកនេះ ដោយសារមូលហេតុផ្សេងៗ ក្រោមការបង្ខិតបង្ខំ។
ការចេញវីដេអូនេះ បានធ្វើឡើងបន្ទាប់ពី សម្ដេចធិបតី ហ៊ុន ម៉ាណែត បានស្នើឱ្យអន្ទិត ជួន កក្កដា ចេញមុខបញ្ជាក់ការពិតផងដែរ។
អន្ទិត ជួន កក្កដា បានចាត់ទុកថា អ្នកដែលលើកឡើងថា រូបលោកលាចាកសិក្ខាបទក្រោមការបង្ខិតបង្ខំ គឺខុសនឹងការពិតទាំងស្រុង៕
ដោយ ៖ សិលា
