សម្តេចរដ្ឋសភាធិបតី ឃួន សុដារី អញ្ជើញដឹកនាំគណៈកម្មាធិការអចិន្រ្តៃយ៍រដ្ឋសភា ដាក់កម្រងផ្កាគោរពវិញ្ញាណក្ខន្ធសព ឯកឧត្តមនាយឧត្តមសេនីយ៍ ខាំតៃ ស៊ីផាន់ដន រដ្ឋបុរសឡាវដ៏ឆ្នើម នៅស្ថានទូតឡាវ ក្នុងរាជធានីភ្នំពេញ

ចែករំលែក៖

ភ្នំពេញ ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅព្រឹកថ្ងៃទី៤ ខែមេសា ឆ្នាំ២០២៥ បានអញ្ជើញដឹកនាំគណៈកម្មាធិការអចិន្រ្តៃយ៍រដ្ឋសភា ដាក់កម្រងផ្កាគោរពវិញ្ញាណក្ខន្ធសព ឯកឧត្តមនាយឧត្តមសេនីយ៍ ខាំតៃ ស៊ីផាន់ដន (Khamtay Siphandone) អតីតប្រធានគណៈកម្មាធិការមជ្ឈិមនៃបក្សបដិវត្តន៍ឡាវ និងជាអតីតប្រធានរដ្ឋ នៃសាធារណរដ្ឋប្រជាធិបតេយ្យប្រជាមានិតឡាវ នៅស្ថានទូតប្រទេសឡាវ ប្រចាំនៅកម្ពុជា។

ឯកឧត្តមនាយឧត្តមសេនីយ៍ ខាំតៃ ស៊ីផាន់ដន បានទទួលមរណភាព កាលពីថ្ងៃទី២ ខែមេសា ឆ្នាំ២០២៥ ក្នុងជន្មាយុ ១០២ឆ្នាំ។ សម្តេចក៏ដូចជាសមាជិកគណៈប្រតិភូ មានសេចក្តីសោកសង្រេងជាពន់ពេក ក្រៀមក្រំបំផុត ចំពោះ មរណភាពរបស់ ឯកឧត្តមនាយឧត្តមសេនីយ៍ ខាំតៃ ស៊ីផាន់ដន។

សម្តេចរដ្ឋសភាធិបតីប្រធានរដ្ឋសភានិងសមាជិកគណៈកម្មាធិការអចិន្រ្តៃយ៍រដ្ឋសភា បានសម្តែងនូវការសោកស្តាយ និងសូមចូលរួមរំលែកមរណទុក្ខដ៏ក្រៀមក្រំជូនចំពោះ ថ្នាក់ដឹកនាំនិងប្រជាជនឡាវ ព្រមទាំងក្រុមគ្រួសារនៃសព ចំពោះការបាត់បង់រដ្ឋបុរសដ៏ឆ្នើម ដែលបានរួមចំណែកដ៏ធំធេងក្នុងបុព្វហេតុកសាង និងរក្សាស្ថិរភាពនយោបាយ និងការអភិវឌ្ឍសេដ្ឋកិច្ចសង្គម នៃសាធារណរដ្ឋប្រជាធិបតេយ្យប្រជាមានិតឡាវ។

សូមជម្រាបថា ក្នុងវេលាដ៏សោកសៅនេះ សម្តេចរដ្ឋសភាធិបតី ឃួន សុដារី ក៍បានផ្ញើសារលិខិតចូលរួមរំលែកមរណទុក្ខជូន ឯកឧត្តមបណ្ឌិត សាយសំផន ភូមិវិហាន ប្រធានរដ្ឋសភា និងឯកឧត្តម សនសៃ ស៊ីផាន់ដន នាយករដ្ឋមន្ត្រី នៃសាធារណរដ្ឋប្រជាធិបតេយ្យប្រជាមានិតឡាវ ក៏ដូចជាជូន ប្រជាពលរដ្ឋឡាវទាំងអស់ ព្រមទាំងក្រុមគ្រួសារនៃសព ចំពោះការបាត់បង់រដ្ឋបុរសដ៏ឆ្នើម ដែលបានរួមចំណែកដ៏ធំធេងក្នុងបុព្វហេតុកសាង និងរក្សាស្ថិរភាពនយោបាយ និងការអភិវឌ្ឍសេដ្ឋកិច្ចសង្គម នៃសាធារណរដ្ឋប្រជាធិបតេយ្យប្រជាមានិតឡាវ។ ក្នុងអំឡុងពេលកាន់តំណែង ឯកឧត្តម នាយឧត្តមសេនីយ៍ ខាំតៃ ស៊ីផាន់ដន បានខិតខំប្រឹងប្រែងយ៉ាងខ្លាំងក្លា ក្នុងការពង្រឹងទំនាក់ទំនងទ្វេ ភាគី រវាងប្រទេសឡាវ និងប្រទេសកម្ពុជា ក៏ដូចជាការពង្រីកទំនាក់ទំនងជាមួយប្រទេសដទៃផ្សេងទៀតក្នុងតំបន់ និងលើឆាកអន្តរជាតិ។

គណៈប្រតិភូគណៈអចិន្រ្តៃយ៍រដ្ឋសភាកម្ពុជា សូមបួងសួងឱ្យវិញ្ញាណក្ខន្ធ ឯកឧត្តមនាយឧត្តមសេនីយ៍ ខាំតៃ ស៊ីផាន់ដន បានទៅកាន់សុគតិភពកុំបីឃ្លៀងឃ្លាតឡើយ៕

...

ដោយ ៖ សិលា

ចែករំលែក៖
ពាណិជ្ជកម្ម៖
ads2 ads3 ambel-meas ads6 scanpeople ads7 fk Print