ភ្នំពេញ ៖ កម្លាំងនាយកដ្ឋាននគរបាលទេសចរណ៍ នៃអគ្គ ស្នងការដ្ឋាននគរបាលជាតិ បានធ្វើការចាប់ខ្លួនឧក្រិដ្ឋនជនជាតិ កាមេរ៉ូនម្នាក់ បញ្ជូនទៅសាលាដំបូងរាជធានីភ្នំពេញ កាលពីព្រឹកថ្ងៃទី០៣ ខែមេសា ឆ្នាំ២០២៥ ពាក់ពន្ធករណីឆបោក និងជម្រិតទារប្រាក់ពីស្រ្តីជនជាតិឡាវជិត២០ ម៉ឺនដុល្លារអាមេរិក ខណៈបក្ខពួកមួយ ចំនួនទៀត បាននិងកំពុងរត់គេចខ្លួន ។ បើយោងតាមរបាយការណ៍របស់នាយកដ្ឋាននគរបាលទេសចរណ៍ បានឲ្យដឹងថា ករណីបទឆបោកនិងចាប់បង្ខាំង ជំរិតទារប្រាក់នេះ បានកើតហេតុកាលពីថ្ងៃទី២៦ ខែមីនា ឆ្នាំ២០២៥ ប្រព្រឹត្តនៅសង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ ក្នុងសណ្ឋាគារ Poulo Wai Hotel & Apartment ដែលមានជនរងគ្រះឈ្មោះ NOUTTHAVONG KHOUN ភេទស្រី អាយុ៣៧ ឆ្នាំ ជនជាតិឡាវ ។ ដោយឡែកជនសង្ស័យដែលត្រូវកម្លាំងនគរបាលចាប់ខ្លួនមានឈ្មោះ ASHU GEORGE EBOT ជនជាតិកាមេរ៉ូន (CAMEROON) ។ មន្រ្តីនគរបាលទេសចរណ៍បានឲ្យដឹងទៀតថា កាលពីថ្ងៃទី២៤ ខែមីនា ឆ្នាំ២០២៥ ស្ត្រីជនជាតិឡាវម្នាក់ បានប្រគល់លុយសុទ្ធចំនួន ១០០,០០០ ដុល្លារអាមេរិក ឱ្យទៅជនជាតិស្បែកខ្មៅម្នាក់ ដែលស្ត្រីរងគ្រោះអះអាងថា ជាសង្សាររបស់ខ្លួន និងបក្ខពួក ដើម្បីយកទៅទិញឡានចំនួន២គ្រឿង នៅសណ្ឋាគារ POULO WAI HOTEL & APARTMENT សង្កាត់ផ្សារថ្មី៣ ខណ្ឌដូនពេញ ។ ក្រោយពីបានទទួលប្រាក់ហើយ ស្ត្រីរងគ្រោះព្យាយាមទំនាក់ទំនងទៅបុរសដែលជាសង្សារនោះជា ច្រើនលើក ប៉ុន្តែមិនអាចទាក់ទងបាននោះទេ ។ ក្រោយមកក៏មានបុរសម្នាក់ឈ្មោះ MIMBANG ROMEO AYUK ភេទប្រុស អាយុ ៣៧ឆ្នាំ ជនជាតិកាមេរ៉ូន (CAMEROON) បានទាក់ទងមកស្ត្រីរងគ្រោះដោយប្រាប់ថា បុរសជាសង្សាររបស់ខ្លួនត្រូវបានប៉ូលីសចាប់ខ្លួន និងបានប្រាប់ឱ្យស្ត្រីរងគ្រោះរកប្រាក់ចំនួន ៧០,០០០ ដុល្លារអាមេរិក ដើម្បីយកទៅលោះបុរសជាសង្សាររបស់ខ្លួនពីកន្លែងប៉ូលីស ។

ពេលនោះស្ត្រីរងគ្រោះបានឆ្លើយតបថា ខ្លួនគ្មានប្រាក់ចំនួន ៧០,០០០ដុល្លារអាមេរិក ទេ ស្រាប់តែជនសង្ស័យឈ្មោះ MIMBANG ROMEO AYUK បានឱ្យស្ត្រីរងគ្រោះយកប្រាក់ចំនួន ៥០,០០០ ដុល្លារអាមេរិក ដោយបានផ្ញើរូបភាពសង្សារជាប់ខ្នោះ តាមបណ្តាញទំនាក់ទំនងសង្គម (Telegram) ។ តែតាមពិតក្រុមឧក្រិដ្ឋជនទាំងនេះបានប្រឌិតរឿងទាំងអស់ថា សង្សាររបស់នាងត្រូវចាប់ខ្លួន ដោយធ្វើជាដាក់ខ្នោះសង្សាររបស់នាង ដើម្បីផលប្រយោជន៍ចង់បានប្រាក់តែប៉ុណ្ណោះ ។

បន្ទាប់មកជនសង្ស័យឈ្មោះ MIMBANG ROMEO AYUK បានឱ្យស្រ្តីរងគ្រោះណាត់ជួប ដើម្បីប្រគល់ប្រាក់ដោយឱ្យជន សង្ស័យឈ្មោះ ASHU GEORGE EBOT មកទទួលប្រាក់ជំនួសមុខឱ្យឈ្មោះ MIMBANG ROMEO AYUK នៅហាងភោជនីយដ្ឋានតន្ត្រីភ្នំមាស៩៩ ផ្លូវលេខ៤៣០ កែង៥០២ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ក៏ត្រូវបានកម្លាំងនគរបាលចាប់ខ្លួនតែម្តងទៅ ដោយមានការបញ្ជារពីនាយឧត្តមសេនីយ៍ ស ថេត អគ្គស្នងការនគរបាលជាតិ ក្រោមការសម្របសម្រួលពីឯកឧត្តម ច្រឹង ខ្មៅ ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ ។

សូមរម្លឹកផងដែរថា ឧក្រិដ្ឋជនរូបនេះ ធ្លាប់ជាប់ពន្ធធនាគារម្ដងរួចមកហើយ កាលពីថ្ងៃទី៣០ ខែវិច្ឆិកា ឆ្នាំ២០២០ ត្រូវបានកម្លាំងកងរាជអាវុធហត្ថលើផ្ទៃប្រទេសចាប់ខ្លួន បន្ទាប់ពីទទួលបានពាក្យបណ្តឹងជនរងគ្រោះពីបទ«ឆបោក និងលួចមានស្ថានទម្ងន់ទោស និងកំហែងយកមានស្ថានទម្ងន់ទោស» នៅក្នុងខណ្ឌជ្រោយចង្វារ នៅក្នុងទំហំទឹកប្រាក់ប្រមាណ៣៥ ម៉ឺនដុល្លារអាមេ រិក តែជនរងគ្រោះបានផ្ញើឲ្យពួកគេជិត៣០ ម៉ឺនដុល្លារអាមេរិកប៉ុណ្ណោះ ។ ក្រោយពីជាប់ឃុំខ្លួននៅក្នុងពន្ធនាគារបានចំនួន១ឆ្នាំ ៦ខែ ត្រូវបានលោក សាយ ណូរ៉ា ព្រះរាជអាជ្ញារងអមសាលាដំបូ ងរាជធានីភ្នំពេញ ចេញដីកាបង្គាប់ឲ្យដោះលែងវិញនៅថ្ងៃទី១៦ ខែមិថុនា ឆ្នាំ២០២២ ។ នៅពេលចេញពីពន្ធនាគារជនឧក្រិដ្ឋរូបនេះ នៅមិនរាងចាលបានបង្កើតបក្ខពួករៀបគំរោងធ្វើសកម្មភាព តាមរូបភាព ឆបោក និងជម្រិតទារប្រាក់ដដែល ៕ ដោយ៖ រ៉ារ៉ា