ផ្នែកមួយនៃការដ្ឋានសាងសង់ផ្លូវរថភ្លើងក្រោមដីថ្មីនៅ Gyeonggi បានបាក់ស្រុតអំឡុងពេលសាងសង់ក្នុងជម្រៅ 30 ម៉ែត្របណ្តាលឲ្យជាប់គាំងកម្មករ។

ហេតុការណ៍នេះបានកើតឡើងកាលពីវេលាម៉ោង៣និង១៧នាទីរសៀលថ្ងៃទី ១១ខែមេសា នៅឯការដ្ឋានសាងសង់ខ្សែរថភ្លើងក្រោមដី Sinansan ថ្មីនៅជិតផ្លូវប្រសព្វ Yangji, Gwangmyeong, ខេត្ត Gyeonggi ប្រទេសកូរ៉េខាងត្បូង។ ហេតុការណ៍នេះបានបណ្តាលឲ្យផ្លូវនៅចំណុចប្រសព្វបាក់ និងខូចខាតអគារពាណិជ្ជកម្មជុំវិញ។
អាជ្ញាធរកូរ៉េខាងត្បូងបានបិទផ្លូវតភ្ជាប់ទីក្រុង Gwangmyeong និងខេត្ត Anyang នៅព្រឹកថ្ងៃដដែល បន្ទាប់ពីបានរកឃើញហានិភ័យនៃការបាក់ស្រុតនៅកន្លែងសាងសង់។ កម្មករ ១៧ នាក់ត្រូវបានបញ្ជូនទៅពិនិត្យសុវត្ថិភាពនៃផ្លូវរូងក្រោមដី មុនពេលវាដួលរលំ ដែលប្រាំនាក់ដំបូងមិនអាចទាក់ទងបាន។ មនុស្សបីនាក់ក្រោយមកត្រូវបានបញ្ជាក់ថាមានសុវត្ថិភាព ពីរនាក់បានជាប់នៅក្រោមដី។
ក្រុមជួយសង្គ្រោះបានទាក់ទងកម្មករម្នាក់ក្នុងចំណោមកម្មករពីរនាក់ដោយជោគជ័យ តែវាមិនច្បាស់ថាម្នាក់ទៀតនៅរស់ឬស្លាប់នោះទេ។
កន្លងមក កម្មករបានរាយការណ៍ពីការខូចខាតដល់ប្រព័ន្ធជំនួយផ្លូវរូងក្រោមដីដែលមានជម្រៅ 30 ម៉ែត្រ និងសំឡេងមិនធម្មតាចេញពីខាងក្នុង។ អាជ្ញាធរបានពង្រីកការបិទចរាចរណ៍ និងចាប់ផ្តើមជម្លៀសនៅថ្ងៃត្រង់ថ្ងៃដដែល។
ប៉ូលិសមិនបានរាយការណ៍ពីការរងរបួសពីអគារនៅជាប់គ្នានោះទេ។ អាជ្ញាធរកំពុងស៊ើបអង្កេតរកមូលហេតុនៃឧបទ្ទវហេតុនេះ និងពិនិត្យសុវត្ថិភាពនៅតំបន់នោះ។
ខ្សែរថភ្លើងក្រោមដី Sinansan ប្រវែង 29.7 គីឡូម៉ែត្រ ដែលត្រូវបានសាងសង់រួចរាល់ហើយនោះ នឹងតភ្ជាប់ទីក្រុងសេអ៊ូល ជាមួយនឹងទីក្រុងរណបដូចជា Gwangmyeong, Ansan និង Siheung ។ ដំណាក់កាលទី 1 ដែលលាតសន្ធឹងពី Sa-dong ក្នុង Ansan ទៅស្ថានីយ Yeouido ក្នុងទីក្រុងសេអ៊ូល ត្រូវបានគេរំពឹងថានឹងចាប់ផ្តើមប្រតិបត្តិការនៅចុងឆ្នាំ2026 ៕ដោយធីរីណា

រូបថត​: vnexpress