ភ្នំពេញៈ បុរសម្នាក់ជិះម៉ូតូម៉ាកស៊ុយហ្ស៊ុយគីវីវ៉ា ខ្វះការប្រុងប្រយ័ត្នបានជ្រុលទៅបុកឡំប្រឺតាពីក្រោយដែលឈប់ចតនៅលើផ្លូវបណ្តាលឱ្យដួលសន្លប់ស្តូកស្តឹង។
ហេតុការណ៍នេះបានកេីតឡេីងនៅវេលាម៉ោង៨និង៣០នាទីយប់ ថ្ងៃទី១៧ខែមេសា ឆ្នាំ២០២៥ តាមបណ្ដោយផ្លូវលេខ៤៨៨ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។
តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកេីតហេតុគេបានឃើញបុរសម្នាក់វ័យប្រហែលជាង៥០ឆ្នាំ ជិះម៉ូតូម៉ាក ស៊ុយហ្ស៊ុយគីវីវ៉ា ពណ៌ខ្មៅ ពាក់ស្លាកលេខ ភ្នំពេញ 1KI-4455 ធ្វើដំណើរតាមបណ្ដោយផ្លូវលេខ៤៨៨ក្នុងទិសដៅពីលិចទៅកេីត លុះមកដល់ចំនុចកេីតហេតុ ដោយសារតែអ្នកបេីកម៉ូតូខ្វះការប្រុងប្រយ័ត្នក៏ជ្រុលទៅបុកឡំប្រឺតា ពណ៌ស ពាក់ស្លាកលេខ តាកែវ1U-0322 ដែលម្ចាស់ឈប់ចតនៅលើផ្លូវដើម្បីរង់ចាំដឹកភ្ញៀវ បណ្តាលឲ្យដួលបោកទៅនឹងផ្លូវ សន្លប់ស្តូកស្តឹងបាត់ស្មារតី ត្រូវបានបងប្អូនប្រជាពលរដ្ឋនិងសមត្ថកិច្ចជួយហៅរថយន្តសាមុយរបស់មន្ទីរពេទ្យមិត្តភាពខ្មែរសូវៀតមកដឹកយកទៅសង្គ្រោះផងដែរ ។
ក្រោយកេីតហេតុ មធ្យោបាយទាំងអស់ត្រូវសមត្ថកិច្ចជំនាញចរាចរណ៍ធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌចំការមន រង់ចាំដំណោះស្រាយ ៕
ដោយ៖សុខាសែនជ័យ
