ឈានចូលវ័យ 37 ឆ្នាំ កំពូលតារាបាល់ទាត់ Lionel Messi និយាយថា គាត់មានអារម្មណ៍ដឹងគុណ និងមានសំណាងណាស់ដែលបានឈ្នះរាល់ពានធំៗក្នុងវិស័យកីឡាបាល់ទាត់ទាំងក្នុងក្លឹប និងកម្រិតអន្តរជាតិ។

សមិទ្ធផលថ្នាក់អន្តរជាតិរបស់ Messi រួមមាន U20 World Cup មេដាយមាសអូឡាំពិក ពាន Copa America ពីរ និង World Cup ជាមួយអាហ្សង់ទីន។ នៅកម្រិតក្លឹប គាត់បានឈ្នះពានរង្វាន់ Champions League ចំនួន 4 ដង ពានរង្វាន់ La Liga 10 ដង និងពានរង្វាន់ Ligue 1 ចំនួនពីរ។ គាត់ក៏ទទួលបានពានរង្វាន់ Ballon d’Or ចំនួនប្រាំបី និងស្បែកជើងមាសអឺរ៉ុបចំនួនប្រាំមួយផងដែរ។

Messi បាននិយាយនៅក្នុងបទសម្ភាសន៍ជាមួយប៉ុស្តិ៍ YouTube Simplemente Futbol ថា “វាមានតម្លៃក្នុងការឈ្នះអ្វីគ្រប់យ៉ាងនៅក្នុងកីឡាបាល់ទាត់។ ដូចដែលខ្ញុំបាននិយាយ ខ្ញុំពិតជាសំណាងណាស់ដែលបានឈ្នះអ្វីៗគ្រប់យ៉ាងជាមួយ Barcelona និងអាហ្សង់ទីន។ ខ្ញុំដឹងគុណខ្លាំងណាស់ដែលព្រះបានប្រទានឱ្យខ្ញុំនូវអ្វីគ្រប់យ៉ាង”។

Messi បាន​លេចធ្លោ​ឡើងជាមួយក្រុម Barcelona ក្នុង​ឆ្នាំ ២០០៥ ក្នុង​វ័យ ១៧ ឆ្នាំ​។ ក្នុងអំឡុងរដូវកាល 2005-2006 គាត់បានដើរតួនាទីយ៉ាងសំខាន់ក្នុងការជួយក្រុមផ្តួល Chelsea ដែលកំពុងធ្វើដំណើរទៅកាន់ជើងឯក Champions League ជាលើកដំបូងរបស់គាត់។ គាត់បានសរសើរមិត្តរួមក្រុមចាស់ដូចជា Ronaldinho, Deco, Carles Puyol, Xavi និង Andrés Iniesta ក៏ដូចជាគ្រូបង្វឹក Frank Rijkaard សម្រាប់ការជួយបង្កើតអាជីពដំបូងរបស់គាត់។ 

អាជីព​របរបស់Messiបាន​ឡើង​ដល់​កម្រិត​ថ្មី​ទៀតក្រោម​ការ​ដឹកនាំ​របស់​លោក Pep Guardiola ពី​ឆ្នាំ ២០០៨ មក។ ក្នុងអំឡុងពេលនោះ Messi បានឈ្នះពានរង្វាន់ Champions League ចំនួនពីរ ជើងឯក La Liga បីដង និង Ballon d’Or បួនដង ខណៈពេលដែលស៊ុតបញ្ចូលទីបានពី 30 ទៅ 70 គ្រាប់ក្នុងមួយរដូវកាល។ គាត់នៅតែរក្សាកំណត់ត្រាសម្រាប់គ្រាប់បាល់ច្រើនបំផុតក្នុងរដូវកាលអឺរ៉ុបតែមួយ (73 គ្រាប់ក្នុងឆ្នាំ 2011-2012) និងគ្រាប់បាល់ច្រើនបំផុតក្នុង១ឆ្នាំ(91គ្រាប់ក្នុងឆ្នាំ 2012)។

នៅឆ្នាំ 2021 ប្រធានក្លឹប Barcelona លោក Joan Laporta បានធ្វើឱ្យអ្នកគាំទ្រភ្ញាក់ផ្អើលដោយការសម្រេចចិត្តមិនបន្តកិច្ចសន្យារបស់ Messi ដោយសារបញ្ហាហិរញ្ញវត្ថុរបស់ក្លឹប។ ក្រោយមក Messi បានចូលរួមជាមួយ Paris Saint-Germain ពីររដូវកាល មុនពេលផ្លាស់ទៅ Inter Miami ។ គាត់​បាន​បង្ហើប​ថា គាត់​សង្ឃឹម​ថា​នឹង​ត្រលប់​ទៅ Barcelona វិញ​បន្ទាប់​ពី​ឈ្នះ World Cup 2022 ប៉ុន្តែ​ផែនការ​មិន​បាន​សម្រេច។

កិច្ចសន្យាបច្ចុប្បន្នរបស់ Messi ជាមួយ Inter Miami ដំណើរការរហូតដល់ដំណាច់ឆ្នាំ 2025។ មិនថាគាត់ជ្រើសរើសបន្ត ឬអត់អាចមានឥទ្ធិពលលើការត្រៀមខ្លួនរបស់គាត់សម្រាប់ FIFA World Cup ឆ្នាំ 2026 ដែលនឹងធ្វើជាម្ចាស់ផ្ទះដោយសហរដ្ឋអាមេរិក ម៉ិកស៊ិក និងកាណាដា។