ខេត្តកំពត ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា មានអ្នកវិភាគក្រៅស្រុកមួយរូប បានបំភ្លៃថា តាមរយៈដំណើរទស្សនកិច្ចរបស់ប្រធានាធិបតីចិន មកកម្ពុជាលើកនេះ រាជរដ្ឋាភិបាល បានប្រគល់កម្ពុជាឱ្យចិនគ្រប់គ្រង ដែលការវិភាគបែបនេះ គឺជាការឆោតល្ងង់ខ្លាំងណាស់និងប្រាសចាកពីការពិតទាំងស្រុង។
ក្នុងពិធីសម្ពោធដាក់ឱ្យប្រើប្រាស់ជាផ្លូវការ កំពង់ផែទេសចរណ៍អន្តរជាតិខេត្តកំពត នៅព្រឹកថ្ងៃទី២១ ខែមេសា ឆ្នាំ២០២៥ សម្តេចបវរធិបតី ហ៊ុន ម៉ាណែត បានថ្លែងថា នៅក្នុងចំណុចទី៣នៃសេចក្តីថ្លែង ការណ៍រួច បានគូសបញ្ជាក់ថា ភាគីទាំងពីរបញ្ជាក់ជាថ្មីនូវការគាំទ្រផលប្រយោជន៍ស្នូល អធិបតេយ្យភាពជាតិ និងបូរណភាពទឹកដីរបស់គ្នាទៅវិញទៅមក ព្រមទាំងប្រឆាំងដាច់ខាតចំពោះការជ្រៀតជ្រែករបស់បរទេសក្នុងកិច្ចការផ្ទៃក្នុងប្រទេសនីមួយៗ។
សម្តេចបវរធិបតី ហ៊ុន ម៉ាណែត បានគូសបញ្ជាក់ថា ការលើកឡើងរបស់ក្រុមជ្រុលនិយម គឺកំពុងជីកដីកប់ខ្លួនឯងទៅវិញទេ ដែលចោទថារដ្ឋាភិបាលកម្ពុជាឱ្យប្រទេសចិនគ្រប់គ្រងប្រទេសកម្ពុជា។
សម្តេចបវរធិបតី ហ៊ុន ម៉ាណែត ក៏បានគូសបញ្ជាក់សាជាថ្មីពីជំហររបស់រាជរដ្ឋាភិបាលដែលមិនប្រែប្រួលដាច់ខាត គឺកសាងទំនាក់ទំនងល្អ មិត្តភាពជាមួយគ្រប់បណ្តាប្រទេសទាំងអស់នៅលើ ពិភពលោក ដើម្បីទាញយកផលប្រយោជន៍ជូនជាតិនិងប្រជាជនកម្ពុជា។
សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានលើថា ៖ ចិន និងអាមេរិក ជួយគ្នារស់ !
សម្ដេច ហ៊ុន ម៉ាណែត ថ្លែងថា ចិន វិនិយោគនៅអាមេរិកក្នុងទំហំទឹកប្រាក់ជាច្រើនសន្ធឹកសណ្ឋាប់ ចិនទិញយកក្រុមហ៊ុនឡានរបស់ស៊ុយអ៊ែត ចិនវិនិយោគពេញអាស៊ាន។ ត្រង់ចំណុចនេះ សម្ដេចធិបតី ហ៊ុន ម៉ាណែត មើលឃើញថា ចិន និងអាមេរិកជួយគ្នារស់។ សម្ដេចធិបយីក៏ឆ្លើយតបថា ការវិនិយោគរបស់ចិននៅកម្ពុជា មិនបានធ្វើឱ្យបាត់បង់អធិបតេយ្យភាពឡើយ ព្រោះនៅប្រទេសផ្សេងៗដែលចិនវិនិយោគក៏មិនបាត់បង់អធិបតេយ្យភាពដូចគ្នា ៕
ដោយ ៖ សិលា
