ភ្នំពេញ៖ លោកឧត្តមសេនីយ៍ឯក ជួន ណារិន្ទ អគ្គស្នងការរងនិងជាស្នងការនគរបាលរាជធានីភ្នំពេញ នៅព្រឹកថ្ងៃសៅរ៍ទី២៧ ខែមេសា ឆ្នាំ២០២៥នេះ បានឱ្យដឹងតាមរយៈបណ្ដាញសង្គមហ្វេសប៊ុកផ្លូវការរបស់លោកថា៖ សូមគោរព និងជម្រាបជូនមហាជនមេត្តាជ្រាបថា នាវេលាម៉ោង០០ និង៣០នាទីរំលងអធ្រាត្រ ឈានចូលថ្ងៃ២៧ ខែមេសានេះ នៅក្រោមស្ពានអាកាស ក្នុងខណ្ឌចំការមន មានសំឡេងផ្ទុះបន្តិច ។
លោកឧត្តមសេនីយ៍ឯក ជួន ណារិន្ទ បានឱ្យដឹងទៀតថា ភ្លាមៗសមត្ថកិច្ចជំនាញបានចុះទៅដល់ បានស្រាវជ្រាវនៅកន្លែងកើតហេតុគឺពិនិត្យឃើញថា មានបុរសជនជាតិខ្មែរម្នាក់ដែលមានសតិមិនល្អ បានអង្គុយដុតកេសស្នោលេង ដោយក្នុងកេសសំរាមមានបំពង់ហ្គាសទូទឹកកកចាស់ខូចចោលនៅក្នុងនោះធ្វើឱ្យក្ដៅហើយផ្ទុះតែម្ដង។
លោកឧត្តមសេនីយ៍ឯកស្នងការ បានគូសបញ្ជាក់ថា ដូច្នេះ សូមមហាជនមេត្តាគោរពជូនជ្រាបជាព័ត៌មាន(គឺមិនមានហេតុការណ៍អាក្រក់ណាមួយកើតឡើងនោះទេ)៕
ដោយ៖តារា
