សហរដ្ឋអាមេរិក និងអ៊ុយក្រែនបានចុះហត្ថលេខាលើកិច្ចព្រមព្រៀងមួយ ដែលនឹងផ្តល់ឱ្យក្រុងវ៉ាស៊ីនតោន ចូលទៅកាន់ធនធានធម្មជាតិមួយចំនួនរបស់ប្រទេសអ៊ុយក្រែនដែលហែកហួរដោយសង្រ្គាម។
សារព័ត៌មានBBC បានឃើញសេចក្តីព្រាងនៃកិច្ចព្រមព្រៀង ប៉ុន្តែមិនមែនជាអត្ថបទចុងក្រោយទេ ហើយដោយផ្អែកលើកិច្ចព្រមព្រផងនោះ និងសេចក្តីថ្លែងការណ៍ជាសាធារណៈពីភាគីទាំងពីរ ខាងក្រោមនេះជាចំណុចសំខាន់ៗមួយចំនួន
1. គ្មានការសងត្រលប់របស់អ៊ុយក្រែនទៅសហរដ្ឋអាមេរិកទេ។
លោក Trump ធ្លាប់បានទាមទារឱ្យអ៊ុយក្រែនសងវិញនូវជំនួយចំនួន 350ពាន់លានដុល្លារ ដែលលោកអះអាងថាត្រូវបានផ្តល់ដោយសហរដ្ឋអាមេរិកក្នុងអំឡុងពេលសង្រ្គាម ដែលជាលក្ខខណ្ឌមួយដែល Zelensky បានច្រានចោល។
ប៉ុន្តែវ៉ាស៊ីនតោនហាក់ដូចជាបានធ្វើសម្បទាន។ នាយករដ្ឋមន្ត្រីអ៊ុយក្រែនលោក Denys Shmyhal បាននិយាយថា កិច្ចព្រមព្រៀងនេះមិនបានកំណត់ថាប្រទេសរបស់លោកសងបំណុលដែលសន្មត់ថាជា “បំណុល” នោះទេ។
2. ជាការដំឡើងសំឡេងតឹងតែងពីអាមេរិកទៅកាន់ពូទីន
ភាសាដែលប្រើដោយសហរដ្ឋអាមេរិកក្នុងការប្រកាសកិច្ចព្រមព្រៀងគឺកាន់តែធ្ងន់ធ្ងរចំពោះរុស្ស៊ីជាងករណីធម្មតារបស់រដ្ឋបាល Trump ។នេះនឹងធ្វើឱ្យទីក្រុង Kyiv សប្បាយចិត្ត ដែលបានទាមទារឱ្យដាក់សម្ពាធបន្ថែមទៀតលើប្រទេសរុស្ស៊ី នៅក្នុងកិច្ចពិភាក្សារវាងទីក្រុងម៉ូស្គូ និងទីក្រុងវ៉ាស៊ីនតោន ដើម្បីពិភាក្សាអំពីបទឈប់បាញ់ដែលអាចកើតមាន។
3. ប្រេង និងឧស្ម័នក៏រួមបញ្ចូលជាមួយរ៉ែផងដែរ
ទោះបីជាមានការពិភាក្សាជាច្រើនជុំវិញកិច្ចព្រមព្រៀងទាក់ទងនឹងទ្រព្យសម្បត្តិរ៉ែរបស់អ៊ុយក្រែនក៏ដោយ កិច្ចព្រមព្រៀងនេះក៏រួមបញ្ចូលផងដែរនូវការផ្តល់សម្រាប់គម្រោងប្រេង និងឧស្ម័នថ្មី និងហេដ្ឋារចនាសម្ព័ន្ធដែលពាក់ព័ន្ធ។នេះត្រូវបានគេមើលឃើញថាជាការបន្ទន់ជំហររបស់អ៊ុយអ៊ុយក្រែន ដោយវាពុំមាននៅក្នុងសេចក្តីព្រាងនៃកិច្ចព្រមព្រៀងមុនៗ។
4. គ្មានការរារាំងដល់មហិច្ឆតារបស់អ៊ុយក្រែនចូលជាសមាជិកអ៉ឺរ៉ុប
អ៊ុយក្រែនបានប្រាថ្នាជាយូរមកហើយក្នុងការចូលរួមជាមួយសហភាពអឺរ៉ុប ហើយការចរចាចូលជាសមាជិកបានចាប់ផ្តើមជាផ្លូវការកាលពីខែមិថុនា។ មានការព្រួយបារម្ភមួយចំនួននៅក្នុងទីក្រុង Kyiv ដែលកិច្ចព្រមព្រៀងធនធានអាចរារាំងលទ្ធភាពរបស់អ៊ុយក្រែនក្នុងការចូលរួមជាមួយសហភាពអឺរ៉ុប ប្រសិនបើប្រទេសនេះផ្តល់ការអនុគ្រោះដល់វិនិយោគិនអាមេរិក ដោយសារតែ Kyiv និង Brussels មានទំនាក់ទំនងដៃគូយុទ្ធសាស្ត្រលើវត្ថុធាតុដើមរួចហើយ។ ប៉ុន្តែអត្ថបទនៃកិច្ចព្រមព្រៀងនេះនិយាយថា សហរដ្ឋអាមេរិកទទួលស្គាល់ចេតនារបស់អ៊ុយក្រែនក្នុងការចូលរួមជាមួយសហភាពអឺរ៉ុប និងតម្រូវការសម្រាប់កិច្ចព្រមព្រៀងនេះមិនឲ្យមានជម្លោះជាមួយនោះទេ។
5.ប្រាក់ចំណេញនឹងត្រូវវិនិយោគឡើងវិញនៅអ៊ុយក្រែនរយៈពេល 10 ឆ្នាំ
ធាតុដ៏គួរឱ្យចាប់អារម្មណ៍មួយទៀតនៃកិច្ចព្រមព្រៀងនេះគឺថា សម្រាប់ទសវត្សរ៍ដំបូងនៃមូលនិធិវិនិយោគកសាងឡើងវិញ ប្រាក់ចំណេញនឹងត្រូវបាន វិនិយោគឡើងវិញទាំងស្រុងនៅក្នុងសេដ្ឋកិច្ចរបស់ប្រទេសអ៊ុយក្រែន។ នេះពិតជាមានសក្តានុពលខ្លាំង ប្រសិនបើមិនមានអត្ថប្រយោជន៍ផ្នែកហិរញ្ញវត្ថុសម្រាប់សហរដ្ឋអាមេរិកសម្រាប់រយៈពេល 10 ឆ្នាំ។ អ៊ុយក្រែននិយាយថា ខ្លួនរំពឹងថាប្រាក់ណាមួយដែលចូលមកក្នុងមូលនិធិនឹងឆ្ពោះទៅរកការកសាងប្រទេសឡើងវិញ និងគម្រោងថ្មីៗ។ បន្ទាប់ពីរយៈពេលដំបូងនោះ ប្រាក់ចំណេញអាចត្រូវបានចែកចាយរវាងដៃគូ។ រដ្ឋមន្ត្រីក្រសួងរតនាគារអាមេរិក Scott Bessent បានប្រាប់ Fox News ថា កិច្ចព្រមព្រៀងនេះគឺជាសញ្ញាមួយដល់ប្រជាជនអាមេរិកថា “យើងមានឱកាសចូលរួម ទទួលបានថវិកាមួយចំនួន និងសព្វាវុធ សំណងសម្រាប់អ្នកទាំងនោះ និងធ្វើជាដៃគូជាមួយភាពជោគជ័យរបស់ប្រជាជនអ៊ុយក្រែន”។
6. អ៊ុយក្រែនត្រូវបន្តទទួលជំនួយយោធារបស់អាមេរិច
អាមេរិកបានកំណត់កិច្ចព្រមព្រៀងនេះថាជាកិច្ចព្រមព្រៀងដ៏សំខាន់មួយដើម្បីចុះហត្ថលេខាប្រសិនបើអ៊ុយក្រែនត្រូវបន្តទទួលជំនួយយោធារបស់ខ្លួន។ ឧបនាយករដ្ឋមន្ត្រីទីមួយរបស់អ៊ុយក្រែន Yulia Svyrydenko ដែលបានហោះទៅទីក្រុងវ៉ាស៊ីនតោនឌីស៊ី ដើម្បីចុះហត្ថលេខាលើកិច្ចព្រមព្រៀងនេះ បាននិយាយថា ខ្លួនស្រមៃថាសហរដ្ឋអាមេរិកនឹងផ្តល់ជំនួយថ្មីៗនាពេលអនាគត ដូចជាប្រព័ន្ធការពារដែនអាកាសជាដើម។
7. ប៉ុន្តែអាមេរិកនៅតែអាចដើរចេញបានគ្រប់ពេល
វាហាក់ដូចជាមិនមានការធានាសន្តិសុខជាក់ស្តែងពីសហរដ្ឋអាមេរិក ដែលជាអ្វីដែលអ៊ុយក្រែន និងអឺរ៉ុបបានជំរុញឱ្យសេតវិមានផ្តល់ជាយូរយារមកហើយ។ លោក Trump មានការស្ទាក់ស្ទើរក្នុងការផ្តល់ការប្តេជ្ញាចិត្តខាងយោធាដូចគ្នាដែលលោក Biden បានផ្តល់ឱ្យ។ ផ្ទុយទៅវិញ ចំណាប់អារម្មណ៍របស់គាត់ក្នុងការបន្តដំណើរទៅមុខជាមួយនឹងការគាំទ្ររបស់សហរដ្ឋអាមេរិកសម្រាប់អ៊ុយក្រែនគឺមានអត្ថន័យច្រើនជាងនេះ ដោយសារតែការប្តេជ្ញាចិត្តផ្នែកសេដ្ឋកិច្ចដែលមានចែងនៅក្នុងកិច្ចព្រមព្រៀងនេះ។ នោះមានន័យថា នឹងនៅតែមានភាពផុយស្រួយចំពោះការប្តេជ្ញាចិត្តរបស់សម្ព័ន្ធមិត្តដ៏សំខាន់បំផុតរបស់អ៊ុយក្រែន។
