កាលពីថ្ងៃទី 2 ខែឧសភា រដ្ឋមន្ត្រីការបរទេសអ៊ុយក្រែន លោក Andriy Sybiha បាននិយាយថា អ៊ុយក្រែននឹងមិនយល់ព្រម “សន្តិភាពក្នុងតម្លៃណាក៏ដោយ” ជាមួយរុស្ស៊ី។

យោងតាមរដ្ឋមន្ត្រីការបរទេស Andriy Sybiha អ៊ុយក្រែន “ប្រឆាំងនឹងការរឹតបន្តឹងលើអធិបតេយ្យភាព រួមទាំងបញ្ហាទាក់ទងនឹងការជ្រើសរើសសម្ព័ន្ធមិត្ត និងការចូលរួមក្នុងអង្គការ និងប្លុកមួយចំនួន”។ រដ្ឋមន្ត្រីការបរទេស Andriy Sybiha បានសង្កត់ធ្ងន់ថា អ៊ុយក្រែននឹងបន្តកិច្ចខិតខំប្រឹងប្រែងរបស់ខ្លួនដើម្បីចូលរួមជាមួយអង្គការសន្ធិសញ្ញាអាត្លង់ទិកខាងជើង (NATO) ទោះបីជាមានការលំបាកក៏ដោយ។
លោក Andriy Sybiha បាននិយាយថា អ៊ុយក្រែន “មិនទទួលស្គាល់ទឹកដីដែលបាត់បង់ជាផ្នែកមួយនៃប្រទេសរុស្ស៊ី និងមិនយល់ព្រមកាត់បន្ថយចំនួនកងកម្លាំងប្រដាប់អាវុធអ៊ុយក្រែន និងមិនយល់ព្រមក្នុងការកំណត់សកម្មភាពនៃអគារឧស្សាហកម្មយោធា”។ រដ្ឋមន្ត្រីការបរទេសលោក Andriy Sybiha បាននិយាយថា “អ៊ុយក្រែនមិនយល់ព្រមចំពោះសន្តិភាពក្នុងតម្លៃណាមួយទេ។ ជំហរជាមូលដ្ឋានរបស់អ៊ុយក្រែនទាក់ទងនឹងលក្ខខណ្ឌសន្តិភាពនៅតែច្បាស់លាស់និងមិនផ្លាស់ប្តូរ” ។
មុននោះ នាថ្ងៃទី ១ ឧសភា អនុប្រធានាធិបតីអាមេរិក James David Vance បាននិយាយថា មាន “គម្លាតដ៏ធំ” រវាងជំហររបស់រុស្ស៊ីនឹងអ៊ុយក្រែន ក្នុងការដោះស្រាយជម្លោះដែលអាមេរិកចង់បង្រួមតូច។ យោងតាមអនុប្រធានាធិបតីអាមេរិក អ្នកការទូតប្រឈមមុខនឹងភារកិច្ច “ព្យាយាមធ្វើដូចម្ដេចដើម្បីនាំឱ្យភាគីទាំងពីរកាន់តែជិតស្និទ្ធជាមួយគ្នា” ។
អ្នកវិភាគបាននិយាយថា លទ្ធភាពនៃការបន្តការចរចាររវាងរុស្ស៊ីនឹងអ៊ុយក្រែន នឹងនៅតែមានការលំបាកជាច្រើន ពីព្រោះជំហររបស់ភាគីទាំងពីរនៅតែមានភាពខ្វែងគំនិតគ្នាជាច្រើន ដែលធ្វើឲ្យពិបាកក្នុងការផ្សះផ្សា និងសម្របសម្រួលនាពេលខាងមុខ៕ ដោយធីរីណា

រូបថត​: Reuters