ភ្នំពេញ៖ យោងតាមប្រភពព័ត៌មានពីមន្រ្តីនគរបាលខណ្ឌដូនពេញ នៅព្រឹកថ្ងៃទី០៦ ខែឧសភា ឆ្នាំ២០២៥នេះ បានឱ្យដឹងថា ក្មេងទំនើងមួយក្រុមមានគ្នា៦នាក់ និងម៉ូតូ៣គ្រឿងដែលបានបង្ហោះយ៉ាងអនាធិបតេយ្យនៅផ្លូវព្រះមុន្នីវង្ស កែងផ្លូវលេខ២០០ សង្កាត់បឹងរាំង ខណ្ឌដូនពេញ នៅថ្ងៃទី៤ ខែឧសភា ឆ្នាំ២០២៥ ត្រូវបានកម្លាំងអធិការដ្ឋាននគរបាលខណ្ឌដូនពេញឃាត់ខ្លួន។
ក្រោយពីសមត្ថកិច្ចបានធ្វេីការបង្ក្រាបក្រុមក្មេងៗបង្ហោះម៉ូតូចំនួន៦នាក់ និងមធ្យោបាយម៉ូតូចំនួន៣គ្រឿងនិងបានធ្វេីការសាកសួររួចមក លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានចង្អុលបង្ហាញឲ្យអធិការដ្ឋានកោះអញ្ជើញឪពុកម្តាយ និងអាណាព្យាបាលឲ្យមកធានានិងធ្វេីការអប់រំណែនាំ ដោយសាម៉ីខ្លួនត្រូវធ្វេីកិច្ចសន្យាដេីម្បីបានវិលត្រឡប់ទៅកាន់គេហដ្ឋានវិញ ដោយពុំមានការបង់ផាកពិន័យជាប្រាក់កាក់អ្វីឡេីយ។
គួរបញ្ជាក់ថា ចំពោះមធ្យោបាយត្រូវសមត្ថកិច្ចធ្វេីការដកហូតយកទៅរក្សាទុកនៅអធិការដ្ឋានរយៈពេល៣ខែ រហូតដល់មានគោលការណ៍ដឹកនាំជាថ្មីទេីបប្រគល់ទៅឲ្យសាម៉ីខ្លួនវិញ៕ 
ដោយ៖ ជីណា
