ខេត្តព្រះសីហនុ ៖ សូមបងប្អូនប្រជាពលរដ្ឋ ប្រជានេសាទ សាធារណជន ជ្រាប និង សូមកុំមានការភាន់ច្រឡំ ពេលមានលឺសំឡេងកាំភ្លើង រួមជាមួយការចល័តកងទ័ព នាវាចម្បាំងនៅលើផ្ទៃសមុទ្រ និងយន្តហោះចម្បាំងហោះ នៅលើអាកាសតាមពេលវេលាដូច ក្នុងលិខិតជូនដំណឹងនេះ សកម្មភាពនេះ គ្រាន់តែជាសមយុទ្ធនាគមាសឆ្នាំ២០២៥។
រដ្ឋបាលខេត្តព្រះសីហនុ សូមជម្រាបដំណឹងដល់បងប្អូនប្រជាពលរដ្ឋ ប្រជានេសាទ សាធារណជន និងអ្នកសារព័ត៌មានទាំងអស់ឱ្យបានជ្រាបថា កងយោធពលខេមរភូមិន្ទ និងកងទ័ពប្រទេសជាមិត្តនឹងសហការរៀបចំ ធ្វើសមយុទ្ធនាគមាសឆ្នាំ២០២៥ ក្រោមប្រធានបទ «ប្រតិបត្តិការប្រឆាំងភេវរកម្មរួមគ្នា និងការងារ សង្គ្រោះមនុស្សធម៌» នៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ និងនៅលើផ្ទៃសមុទ្រនិង ដែនអាកាសកម្ពុជាក្នុងតំបន់ខេត្តព្រះសីហនុ ចាប់ពីថ្ងៃទី១៤ ដល់ថ្ងៃទី២៨ ខែឧសភា ឆ្នាំ២០២៥។ សមយុទ្ធនាគមាស ឆ្នាំ២០២៥ ក្នុងគោលបំណងដើម្បីលើកកំពស់សមត្ថភាពកងយោធពលខេមរភូមិន្ទក្នុងកិច្ចការពារបូរណភាពទឹកដី ប្រឆាំងនឹងភេរវកម្ម និងជំរុញកិច្ចសហប្រតិបត្តិការ ព្រមទាំងផ្លាស់ប្តូរបទពិសោធន៍គ្នាទៅវិញទៅមកក្នុងកិច្ចការរក្សា សន្តិភាព សន្តិសុខ សុវត្ថិភាពជូនប្រជាពលរដ្ឋ និងការងារសង្គ្រោះមនុស្សធម៌។
អាស្រ័យដូចបានជម្រាបជូនខាងលើ សូមបងប្អូនប្រជាពលរដ្ឋ ប្រជានេសាទ សាធារណជន ជ្រាប និង សូមកុំមានការភាន់ច្រឡំ ពេលមានលឺសម្លេងកាំភ្លើង រួមជាមួយការចល័តកងទ័ព នាវាចម្បាំងនៅលើផ្ទៃសមុទ្រ និង យន្តហោះចម្បាំងហោះនៅលើអាកាសតាមពេលវេលាខាងលើ សកម្មភាពនេះគ្រាន់តែជាសមយុទ្ធនាគមាសឆ្នាំ ២០២៥។
ទទួលបានសេចក្តីជូនដំណឹងនេះ អាជ្ញាធរដែនដីគ្រប់លំដាប់ថ្នាក់ កងកម្លាំងមានសមត្ថកិច្ចគ្រប់ប្រភេទ ប្រធានមន្ទីរ អង្គភាពជុំវិញខេត្ត ត្រូវទទួលបន្ទុកផ្សព្វផ្សាយឱ្យបានទូលំទូលាយ និងសហការអនុវត្តឱ្យបានល្អប្រសើរ៕
ដោយ ៖ សិលា
